Túrkistanda áleýmettik mańyzy bar ónim óndirýshiler úshin elektr tarıfi tómendetildi

ASTANA. KAZINFORM — Túrkistan oblysynyń prokýratýrasy kásipkerlik sýbektilerine tıimdi elektr energııasyn satyp alýǵa járdemdesti.

Vedomstvo 177 ınvestıtsııalyq jobany (Ulttyq pýl — 112, Óńirlik pýl — 64) súıemeldeý baǵytynda belsendi jumys júrgizilip jatyr. Atalǵan jobalarǵa 2,3 trln teńge kóleminde ınvestıtsııa salynyp, 26 myń jumys ornyn qurý josparlanyp otyr.

— Júrgizilgen taldaý nátıjesinde kásipkerlik sýbektileri tutynatyn elektr energııasynyń qunyn negizsiz kóterý faktileri anyqtaldy. Máselen, sút ónimderin óndiretin «BNK AGRO» JShS (jobalyq quny — 4 mlrd teńge, óndiristik qýattylyǵy — 1800 iri qara mal) elektr energııasyn jalpy tarıf boıynsha — 1 kVt/saǵ úshin 39,96 teńgeden satyp alyp kelgen. Al Saýda jáne ıntegratsııa mınıstriniń buıryǵymen 19-áleýmettik mańyzy bar azyq-túlik taýarlarynyń tizbesi bekitilgen (olardyń qataryna taýyq eti, pasterlengen sút ónimderi jáne t. b. kiredi) jáne bul taýar óndirýshiler úshin saralanǵan (jeńildetilgen) tarıf qoldanylýy kózdelgen. Osyǵan uqsas quqyq buzýshylyqtar áleýmettik mańyzy bar azyq-túlik ónimderin óndiretin «Azım ata», «Súleımen ata», «ıAssy qus» sharýa qojalyqtarynda, sondaı-aq jeke kásipkerler R. Mamaraımov jáne M. Mýslımbekov qyzmetinde de anyqtaldy. Prokýrorlyq qadaǵalaý aktisiniń qaralý qorytyndysy boıynsha, joǵaryda kórsetilgen kásipkerlik sýbektilerine qatysty monopolıst «Ońtústik Jaryq Tranzıt» JShS tarapynan 1 kVt/saǵ úshin 34,31 teńge mólsherindegi jeńildetilgen tarıf qoldanyldy, — delingen oblystyq prokýratýra taratqan aqparatta.

Osyǵan deıin Energetıka mınıstrligi qazaqstandyq óndirýshilerdiń halyqaralyq naryqqa shyǵýyn jeńildetkenin jazǵan edik.