Túrkistanda alaıaqtar QMA qyzmetkerleri retinde tanysyp, 15 mln teńge bopsalaǵan
ASTANA. KAZINFORM — Túrkistanda medıtsına uıymynyń basshysyn qorqytyp, 15 mln teńge talap etkender ustaldy, dep habarlaıdy Qarjylyq monıtorıng agenttiginiń baspasóz qyzmeti.
Qarjylyq monıtorıng agenttigi mindetti áleýmettik medıtsınalyq saqtandyrý salasyndaǵy qarajat jymqyrý derekteriniń jolyn kesý boıynsha jumys júrgizip jatqan tusta alaıaqtyq jaǵdaılary jıilep ketti. Qaskóıler ózderin agenttik qyzmetkerleri retinde tanystyryp, «anyqtalǵan zańbuzýshylyqtardy» alǵa tartyp, medıtsına mekemeleriniń basshylaryn qylmystyq jaýapkershilikke tartamyz dep qorqytady. Sonymen qatar syıaqy berse, jaýapkershilikke tartpaýǵa ýáde etip, aqsha talap etedi. Osyndaı alaıaqtyq shemanyń joly Túrkistan oblysynda kesildi.
— Eki adam ózderin agenttik qyzmetkerleri retinde tanystyryp, aldaý jolymen medıtsınalyq uıymdardyń biriniń basshysynan 15 mln teńge kóleminde aqsha alýǵa tyrysqan. 5 mln teńgeni alǵannan keıin alaıaqtar qalǵan 10 mln teńgeni berýdi talap etken. Osy jylǵy 8 tamyzda olardy Túrkistan oblysy boıynsha Ekonomıkalyq tergep-tekserý departamentiniń qyzmetkerleri agenttiktiń Ózindik qaýipsizdik departamentimen birlesip, qylmys ústinde ustady. Sot sybaılastarǵa qatysty qamaýda ustaý túrindegi bultartpaý sharasyna sanktsııa berdi. Tergeý jalǵasyp jatyr, — dedi QMA resmı ókili Ernar Taıjan.
QMA jaýapkershilikke tartamyz dep qorqytyp nemese jazadan qutylýǵa kómektesemiz dep ýáde berip, aqsha talap etý — zańsyz áreket ekenin eskertedi.
— Mundaı derekter týraly QMA Call-ortalyǵyna 1458 nómiri arqyly dereý habarlaý qajet. Azamattardy qarjylyq monıtorıng organdaryna shaqyrý tek óndiristegi sotqa deıingi tergep-tekserý sheńberinde, zańda belgilengen tártippen resimdelip, joldanǵan resmı shaqyrý qaǵazdary negizinde ǵana júzege asyrylatynyn eskertemiz. Azamattardy saq bolýǵa, arandatýshylyqqa jáne alaıaqtardyń aılasyna ermeýge shaqyramyz, — dedi Ernar Taıjan.
Buǵan deıin QMA Mańǵystaý oblysy boıynsha departamenti Áleýmettik medıtsınalyq saqtandyrý qorynyń qarajatyn jymqyrý faktisi boıynsha eki jekemenshik klınıkanyń basshylyǵyna qatysty tergep-tekserý júrgizip jatqany habarlandy.
