Túrkistanda aqyldy aıaldamalar salynady

TÚRKІSTAN. KAZINFORM — «Smart City» tujyrymdamasy aıasynda jańa aıaldamalar men zamanaýı ınfraqurylym iske qosylady. 

Túrkistan qalasyn zamanaýı «Smart City» tujyrymdamasyna negizdelgen aqyldy qalaǵa aınaldyrý baǵytynda aýqymdy jumystar júrgizilip jatyr. Bul Prezıdent Qasym-Jomart Toqaevtyń elimizdiń tsıfrlyq transformatsııasy men qalalyq ınfraqurylymdy jańǵyrtý jónindegi tapsyrmalarynyń naqty júzege asýynyń bir kórinisi. Memleket basshysy óziniń Joldaýynda «Tsıfrlyq tehnologııalar adamdardyń ómir sapasyn jaqsartyp, kúndelikti turmysyn jeńildetýi tıis. Smart City úlgisi barlyq iri qalada engizilýi kerek» dep atap ótken bolatyn.

Osy mindetterdi oryndaý maqsatynda Túrkistanda «Aqyldy aıaldama» jobasy qolǵa alyndy. Joba aıasynda jeke kásipker tartylyp, qazirgi ýaqytta aıaldama ornatýǵa arnalǵan jer telimine memlekettik akt alý jumystary istelip jatyr. Qujattar rásimdelip, senimgerlik basqarý jóninde kelisimshartqa qol qoıylǵannan keıin qurylys jumystary bastalady.

Túrkistan qalasy ákiminiń apparatynyń málimetine súıensek, jańa úlgidegi aıaldamalar qala turǵyndary men qonaqtary úshin barynsha qolaıly ári qaýipsiz bolmaq.

Onda tegin Wi-Fi jelisi, salqyndatqysh júıe, beınebaqylaý kameralary, elektrondy qurylǵylardy qýattaǵysh, joǵary jyldamdyqty optıkalyq ınternet jáne turaqty qýat kózi qarastyrylady. Bul sheshimder turǵyndardyń tsıfrlyq qyzmetterge qoljetimdiligin arttyryp, qoǵamdyq kólikti kútý protsesin áldeqaıda yńǵaıly etedi.

Túrkistanda «Smart City» jobasy tek aıaldamalarmen shektelmeıdi. Qala ákimdigimen birlesip, kóshe jaryqtandyrýdy avtomattandyrý, jol qozǵalysyn ıntellektýaldy basqarý júıesine engizý, beınebaqylaý ortalyqtaryn jańǵyrtý baǵytynda jumys istelip jatyr. Budan bólek, turǵyndardyń qaýipsizdigin arttyrý maqsatynda qala aýmaǵynda qosymsha beınebaqylaý kameralary ornatylyp, derekterdi taldaý júıesi iske qosylyp jatyr.

Túrkistan — tek tarıhı-rýhanı ortalyq qana emes, sonymen birge zamanaýı tehnologııalardy keńinen qoldanatyn ınnovatsııalyq qala bolýǵa baǵyt alyp otyr. «Smart City» jobasy tolyq iske asqan kezde, qalada qoǵamdyq kóliktiń qozǵalysy onlaın baqylanady, turǵyndar memlekettik qyzmetterdi qashyqtan jyldam alady, al qalalyq ınfraqurylym energııany tıimdi paıdalaný arqyly ekologııalyq júktemeni azaıtady.

Jergilikti bılik ókilderi bul bastamalardyń barlyǵy halyqtyń turmys sapasyn jaqsartýǵa jáne Túrkistannyń týrıstik, ekonomıkalyq áleýetin arttyrýǵa baǵyttalǵanyn atap ótti. Qalada iske qosylatyn árbir «aqyldy» nysan tek turǵyndarǵa jaılylyq syılap qana qoımaı, Túrkistannyń jańa beınesin qalyptastyrýǵa úles qosady.

Aıta keteıik, budan buryn Túrkistanda qoǵamdyq kólik júıesi tsıfrlyq tehnologııalar negizinde jańǵyrtylyp jatqanyn jazǵan bolatynbyz.