Túrkistanda Abaıdyń 180 jyldyǵyna oraı jastar men turǵyndarǵa «Abaı joly» romany taratyldy
TÚRKІSTAN. KAZINFORM – Bıyl qazaqtyń uly oıshyly, bas aqyny Abaı Qunanbaıulynyń týǵanyna 180 jyl tolyp otyr. Aıtýly merekege jáne «Jastar kúnine» oraı Túrkistanda rýhanı is-shara ótti. Bul týraly Túrkistan oblysy ákiminiń baspasóz qyzmeti habarlady.
Atap aıtar bolsaq, Abaı eskertkishiniń mańynda aqynnyń ómiri men shyǵarmashylyǵynan syr shertetin kóshpeli kitap kórmesi ótti. Sonymen birge oblys ákimi Nuralhan Kósherov óńirdiń belsendi jastarymen kezdesip, Muhtar Áýezovtiń «Abaı joly» kitabyn tapsyrdy.
– Memleket basshysy Qasym-Jomart Kemeluly ár shańyraqta Abaıdyń kitaby men men Muhtar Áýezovtiń «Abaı joly» romany turýy kerek ekenin aıtqan bolatyn. Sol bastamany Túrkistan oblysynda iske asyrý maqsatynda qonaqtarǵa, jastarǵa «Abaı joly» romany toptastyrylǵan tórt tomdyq kitaptardy tapsyrýdy jón kórdik. Bul kitapty ár oqyǵan saıyn jańa dúnıelermen tanysasyń, jańasha oı túıesiń. Jastarymyz da kitapty oqyp, Abaı ómiriniń tereńine úńiledi dep oılaımyn, - dedi Nuralhan Kósherov.
Belsendi jastar óńir basshysynyń rýhanı máni bar syılyǵyna rızashylyqtaryn bildirip, Abaı murasyna adal bolatyndaryn jetkizdi. Jalpy, 180 jyldyqqa 180 kitap toptamasy shyǵarylyp, jastar men turǵyndarǵa úılestirildi.
Aıta keteıik, osy kúni uıymdastyrylǵan kitap kórmesinde Abaı Qunanbaıulynyń ómirinen, shyǵarmashylyǵynan syr shertetin maǵynaly dúnıeler usynyldy. Abaı Qunanbaıuly beınelengen, erekshe sheberlikpen tigilgen, qabyrǵaǵa iletin kilemshe de kópshiliktiń qyzyǵýshylyǵyn oıatty. Bul syılyqty kitaphanaǵa «Bal tekstıl» kompanııasy tartý etken.
Osylaısha, Túrkistan jastary «Abaı kúni» men «Jastar kúni» merekelerin rýhanı-tanymdyq is-sharamen órnektep, erekshe serpilip qaıtty.