Túrkistanda 9 jastaǵy balanyń baýyrynan ehınokokk qurty alyndy
TÚRKІSTAN. KAZINFORM — Túrkistan oblystyq balalar aýrýhanasynda kúrdeli otanyń biri sátti oryndaldy.
Aq halatty abzal jandar 9 jasar balanyń baýyrynan kólemi 14 santımetrge jetken ehınokokk qurtyn alyp shyqty. Aldyn ala tekserýler barysynda dárigerler qaýipti dıagnozdy anyqtap, naýqastyń ómirine qaýip tóndirgen jaǵdaıǵa jedel sheshim qabyldady.
Bilikti dáriger Muhan Spabekulynyń jetekshiligimen ota ashyq ádispen jasalyp, parazıttik qurt tolyqtaı alynǵan. Qazirgi tańda bala qanaǵattanarlyq jaǵdaıda úıine shyǵaryldy.
Atalǵan ota mindetti áleýmettik medıtsınalyq saqtandyrý (MÁMS) júıesi aıasynda tegin júrgizildi.
Mamandar ata-analarǵa balalardyń densaýlyǵyna erekshe mán berýdi eskertedi. Eger balada mazasyzdyq, ishtiń aýyrýy, álsizdik sııaqty shaǵymdar baıqalsa, ýaqyt ozdyrmaı dárigerge júginý qajet. Sebebi erte dıagnostıka — qaýipti derttiń aldyn alýdyń eń tıimdi joly.
Aıta keteıik, budan buryn Túrkistan oblysynyń turǵyny óziniń týý deregin 30 jyldan keıin dáleldegenin jazǵan bolatynbyz.