Túrkistanda 8 aılyq sábıdiń ishinen ıne shyqty
TÚRKІSTAN. KAZINFORM — Túrkistan qalalyq ortalyq aýrýhanasynyń juqpaly aýrýlar bólimine qyzylsha bolýy múmkin degen dıagnozben 8 aılyq sábı jetkizildi.
Tekserý barysynda júrgizilgen rentgenologııalyq zertteý nátıjesinde balanyń ish qýysynan bógde zat — ıne anyqtaldy.
Sábıdiń mazasyzdanýy men dene qyzýynyń kóterilýi juqpaly aýrýmen emes, dál osy bógde zattyń áserinen bolǵany belgili boldy.
Dárigerlerdiń aıtýynsha, ıne balanyń asqorytý joly arqyly emes, baýyr tusynan engeni anyqtalǵan. Balanyń anasy ıneni sábı ózdiginen jutpaǵanyn jetkizdi.
Túrkistan qalalyq ortalyq aýrýhanasynyń jáne qalalyq balalar aýrýhanasynyń dárigerleri birlesip, shuǵyl ota jasap, qajetti em-sharalardy tolyq kólemde júrgizdi.
— Ýaqytyly jasalǵan hırýrgııalyq ota men turaqty emniń arqasynda sábı qazirgi tańda jyldam qalpyna kele bastady. Bul jaǵdaı sábıdiń anasy tarapynan barlyq ata-analarǵa arnalǵan saqtyq úndeýi boldy. Ol balalardyń qaýipsizdigine erekshe mán berip, jazataıym oqıǵalardyń aldyn alý úshin turmystyq zattarǵa muqııat bolýǵa shaqyrady, — delingen oblystyq densaýlyq saqtaý basqarmasy taratqan aqparatta.
Budan buryn aqmolalyq hırýrgtar 4 jasar balanyń isheginen 39 túıir magnıttik monshaqty alǵanyn jazǵan edik.