Túrkistanda 74 jastaǵy qarııa 45 kelilik bóreneni kóterip, dúıim jurtty tańǵaldyrdy
TÚRKІSTAN. KAZINFORM – «Ónerli ólke» oblystyq óner festıvali aıasynda Ordabasy aýdanynyń mádenıet kúnderi ótip jatyr.
Búgin etnoaýylda ulttyq qundylyqtar nasıhattalyp, sport túrlerinen saıystar uıymdastyryldy. Іs-sharany tamashalaýǵa kelgen túrkistandyq 74 jastaǵy Shavkat Qajymuratov 45 kelilik bóreneni 10 ret kóterip, dúıim jurtty tańǵaldyrdy. Sondaı-aq ol kir tasyn kóterý saıysyna qatysyp, jastarmen kúsh synasty. Jeńis tuǵyrynan kóringen aqsaqal arnaıy marapattaldy.
Іs-sharada arqan tartý, qazaqsha kúres, qol kúres, asyq atý, qoshqar kóterý, láńgi tebý sekildi ulttyq oıyndar dáripteldi. Sonymen qatar aýyl sharýashylyq jáne kásipkerlik salalarynyń kórsetkishi men ónimderinen jáne «Ordabasy tartýlary» atty ulttyq taǵam kórmesi, qolóner sheberleriniń kórmesi kópshilik nazaryna usynyldy.
«Temirlan» halyq teatry men «Jas tolqyn» balalar men jasóspirimder teatry Altybaqan mańynda «Aq súıek» teatrlandyrylǵan qoıylymyn kórsetti. Ordabasy aýdandyq mádenıet úıi janynan qurylǵan «Ordabasy» folklorlyq halyq ansambliniń áýezdi ánderi men dala sarynyna aınalǵan kúıleri rýhanı-mádenı sharanyń sánin keltirdi.
Aıta keteıik, búginde Túrkistan oblysynda 200 myńǵa jýyq zeınetker turady, onyń 11-i – ekinshi dúnıejúzilik soǵys ardageri.
