Túrkistanda 600-den asa maldy qujatsyz tasymaldaǵandar áshkerelendi
TÚRKІSTAN. KAZINFORM — Túrkistan oblysynda respýblıkalyq mańyzy bar avtojoldarda mal urlyǵynyń aldyn alý jáne jolyn kesý maqsatynda aýqymdy reıdtik is-shara ótti.
Oblystyq polıtsııa departamentiniń málimetinshe, arnaıy operatsııaǵa 90 polıtsııa qyzmetkeri men 43 qyzmettik avtokólik jumyldyryldy. Tekserý jumystary táýlik boıy uıymdastyrylyp, oblys aýmaǵyndaǵy negizgi baǵyttar tolyq qamtyldy.
— Jeti táýliktiń ishinde polıtseıler mal tıegen 48 jeńil-júk kóligin toqtatty. Nátıjesinde 38 avtokólikten tıisti qujattarsyz tasymaldanǵan 613 mal anyqtaldy. Qujatsyz mal tasymaldaǵan júrgizýshiler zań aıasynda shara qoldaný úshin qalalyq jáne aýdandyq polıtsııa basqarmalaryna jetkizildi, — delingen vedomstvo habarlamasynda.
Qazirgi tańda is materıaldary ýchaskelik polıtsııa ınspektorlaryna joldanyp, árbir derek boıynsha tıisti tekserý jumystary bastaldy.
Budan buryn Túrkistan oblysynda mal urlyǵymen aınalysqan 19 qylmystyq top ustalǵanyn jazǵan edik.