Túrkistanda 50 myń, Shymkentte 30 myńǵa jýyq bala 1-synypqa qabyldanady
ShYMKENT. KAZINFORM — Óńirde jańa oqý jylyna daıyndyq qarqyndy túrde júrip jatyr.
Shymkent qalasynda qazirgi tańda 6 bilim berý nysanynyń qurylysy júrip jatyr. Onyń ishinde 2 jańa mektep, 3 qosymsha ǵımarat jáne 1 jataqhana bar. Jospar boıynsha jańa oqý jyly bastalǵanǵa deıin 3 nysan — eki jańa mektep pen bir qosymsha korpýs — paıdalanýǵa berilmek.
«Keleshek mektepteri» jobasy aıasynda 1500 oryndyq № 151 mektep pen 1200 oryndyq № 152 jańa mektep oqýshylardy qabyldaıdy. Sondaı-aq, 600 oryndyq qosymsha ǵımaraty bar № 50 mekteptiń qurylysy aıaqtalyp, bilim berý protsesine qosylady.
2025-2026 oqý jylynda Shymkent qalasynda 1-synypqa 27 546 balany qabyldaý josparlanǵan. Sáýir aıynan bastap búgingi kúnge deıin 23 041 bala qabyldanyp úlgerdi. Jalpy, 1-11-synyp aralyǵynda qala mektepterinde 271 123 oqýshy bilim ala dep josparlanyp otyr.
Mektep qurylysy men oqýlyqpen qamtý jumystarynyń ýaqtyly oryndalýy jańa oqý jylyn sapaly uıymdastyrýǵa jáne bilim sapasyn arttyrýǵa oń yqpal etpek.
— Jańa oqý jyly qarsańynda Shymkent qalasy ýákiletti organ bekitken tizimge sáıkes 554 myńnan astam oqýlyqpen qamtamasyz etilýi tıis. Bul maqsatqa jergilikti bıýdjetten 2,1 mlrd teńge bólinip, 11 baspamen kelisimshart jasaldy. Qazirgi tańda tasymaldaý jumystarynyń 47 paıyzy oryndaldy. Osy aptanyń sońyna deıin barlyq oqýlyqtar tolyq jetkiziledi, — dedi Shymkent qalasy bilim basqarmasynyń basshysy Gúlnaz Súleımenova.
Al, Túrkistan oblysynda 2024-2025 oqý jylynda 1093 mektep jumys istedi. Onyń ishinde 922-si memlekettik, 171-i jekemenshik bilim ordalary. Bıyl «Keleshek mektepteri» jobasy men jańa qurylystardyń esebinen memlekettik mektepter sany 935-ke jetpek. Jańa oqý jylynda 1-11 synyptarda shamamen 568 myń oqýshy bilim alsa, 1-synypqa 48 316 balany qabyldaý josparlanyp otyr.
Aıta keteıik, budan buryn Túrkistan oblysynda jańa oqý jylynda qansha mektep ashylatynyn jazǵan bolatynbyz.