Túrkistanda 40-qa jýyq kásipkerdiń demalys aımaqtary salynǵan jerleri daýǵa qaldy

TÚRKІSTAN. KAZINFORM — Túrkistan oblysy Tólebı aýdanynda demalys aımaǵyna qomaqty qarjy salǵan 40-qa jýyq kásipker jerinen aıyrylý qaýpine tap boldy.

Kásipkerlerdiń aıtýynsha, olar birneshe jyl buryn jer telimderin resmı qaýly negizinde zańdy túrde alǵan. Sol kezdegi ákimdiktiń sheshimi men tıisti memlekettik organdardyń kelisimderi bar. Alaıda qazir bul qujattardyń kúshi joıylyp, sot sheshimimen jerler zańsyz dep tanylǵan.

Olardyń árqaısysy demalys úılerin salýǵa 30 mln-nan 300 mln teńgege deıin qarjy jumsaǵan. Búginde nysandardyń bir bóligi tolyq salynyp bitse, endi biri týrısterdi qabyldaýǵa daıyn.

— Biz 2022 jyldyń tamyz aıynda qurylys jumystaryn bastadyq. 2023 jyly nysandy aıaqtap, tehnıkalyq pasportyn rásimdep, qabyldaý aktisin aldyq. Sonymen qatar jaryq, gaz, jol jáne ınternet jelilerin óz qarajatymyzǵa júrgizdik. Sol kezdegi okrýg ákimi qurylys alańyna kelip, jumystyń barysynan habardar boldy. Eger irgetasy qalanyp jatqan sátte eskertý jasalǵanda, mundaı shyǵynǵa batpas edik, — deıdi kásipkerdiń biri.

Túıtkildi máselege baılanysty kásipkerler aýdan ákimi Erkeǵalı Álimqulovtyń qabyldaýynda bolyp, narazylyqtaryn bildirdi.

Aýdan ákiminiń málimetinshe, bul másele buǵan deıin de birneshe ret kóterilgen. Onyń aıtýynsha, atalǵan nysandar boıynsha oblystyq memlekettik sáýlet-qurylys baqylaýy basqarmasy sotqa bergen.

— Sot sheshimi shyqqan. Bizdiń qolymyzdaǵy aqparatqa sáıkes, kásipkerler sotta jeńilip qalǵan. Jer telimderiniń basym bóligi jaıylymdyq maqsatta berilgen. Alaıda bul aýmaqtarda demalys aımaqtary salynǵan, — dedi aýdan ákimi.

Kásipkerler sot sheshimimen kelispeı, apellıatsııalyq shaǵym túsirgen.

— Zań buzýshylyqtar sotta dáleldendi. Keıbir azamattar jer telimderin úshinshi tulǵalardan satyp alǵan. Jerdiń nysanaly maqsaty saqtalmaǵan, tıisti ruqsat qujattary rásimdelmegen jaǵdaılar bar. Zańǵa sáıkes, sot óndirisine qabyldanǵan ister boıynsha sheshimdi tek sot organy qabyldaıdy jáne ony basqa memlekettik organdar qaraı almaıdy, — dedi aýdan ákimi.

Uzaqqa sozylǵan másele boıynsha kásipkerler oblys ákimdigine baryp, jaýapty sala basshylarymen kezdesti. Qazirgi tańda komıssııa qurylyp, zerdeleý jumystary júrgizilip jatyr.

Aýdan ákimdiginiń málimetinshe, atalǵan jer ýchaskeleri sot sheshimderiniń negizinde memlekettik menshikke qaıtarylǵan.

— 2020-2021 jyldary Tólebı aýdany Birkólik eldi mekeninde ornalasqan 27 jer ýchaskesi azamattarǵa saıajaı qurylysy úshin berilgen. Keıinnen ýákiletti memlekettik organdar tarapynan júrgizilgen tekserýlerdiń nátıjesinde atalǵan jer ýchaskeleri jer zańnamasynyń talaptaryn buza otyryp jáne moratorıı qoldanylǵan kezeńde berilgeni belgili boldy. Zań buzýshylyqtardy Túrkistan oblysy boıynsha Jer resýrstaryn basqarý departamenti jáne Túrkistan oblysy boıynsha Ekonomıkalyq tergep-tekserý departamenti anyqtaǵan. Osy faktiler boıynsha qylmystyq is qozǵalyp, tıisti tergeý áreketteri júrgizildi, — delingen resmı málimdemede.

Jınalǵan materıaldar Túrkistan oblysynyń mamandandyrylǵan aýdanaralyq sotyna joldanyp, sot sheshimderimen jer ýchaskelerin memlekettik menshikke qaıtarý týraly qaýlylar qabyldanǵan.

— Qazirgi tańda 12 jer ýchaskesi boıynsha apellıatsııalyq shaǵymdar Túrkistan oblystyq sotynda qaralyp jatyr. Barlyq is-shara zań talaptaryna sáıkes jáne quqyqtyq alań aıasynda júzege asyrylady, — dep málim etti vedomstvo.

Budan buryn Tólebı aýdany Birinshi mamyr aýylynda turǵyndar balmuzdaq óndiretin zaýyttyń káriz sýynan shyǵatyn sasyq ıiske shaǵymdanǵan bolatyn. Turǵyndar bul máseleniń mazalap kele jatqanyna 20 jyldaı ýaqyt bolǵanyn jetkizgen edi.