Túrkistanda 4 myń tonnalyq kókónis saqtaý qoımasy salyndy
TÚRKІSTAN. KAZINFORM – Jańadan salynǵan qoımada 3,5 myń tonna kókónis jáne 500 tonna bakaleıa ónimderi saqtalady. Mundaǵy ónimder Túrkistan, Kentaý jáne Arys qalalarynyń turǵyndaryn áleýmettik mańyzy bar azyq-túlikpen qamtamasyz etedi.
4 myń tonnalyq azyq-túlik saqtaý qoımasynyń jalpy quny 1,4 mlrd. teńgeni quraıdy. Joba «Túrkistan» ÁKK» AQ jáne «M-Adal» kompanııasynyń qoldaýymen salynǵan. Aýmaǵy 1 gektar, al aýdany 3,2 myń sharshy metrdi alyp jatyr.
Jalpy qoımada 10 kamera bar. Onyń 8-inde kókónis saqtalady. Atap aıtar bolsaq, 2 000 tonna kartop, 1 000 tonna pııaz, 250 tonna sábiz jáne 250 tonna qyryqqabat jınaýǵa qaýqarly. Al, eki kamera 500 tonna bakaleıa ónimderin saqtaýǵa arnalǵan.
Aldaǵy ýaqytta Saryaǵash qalasynan 3 myń tonnalyq azyq-túlik saqtaý qoımasyn salý josparlanyp otyr. Ol Lenger, Jetisaı, Shardara, Saryǵash qalalarynyń turǵyndaryn áleýmettik mańyzy bar azyq-túlikpen qamtamasyz etedi.
«QR Ulttyq ekonomıka mınıstrligi bergen statıstıkalyq málimetke sáıkes Túrkistan qalasy áleýmettik mańyzy bar azyq-túlik baǵa ındeksi boıynsha Qazaqstannyń qalalarynyń ishinde 3-orynda tur. Respýblıka boıynsha áleýmettik mańyzy bar azyq-túlik baǵa ındeksi 99,9 paıyzdy qurady», - delingen Túrkistan oblysy ákimdigi taratqan aqparatta.
Búginde óńirde áleýmettik mańyzy bar azyq-túlik taýarlarynyń baǵalaryn turaqtandyrý maqsatynda áleýmettik dúkenderdiń sanyn kóbeıtý jumystary júrip jatyr. Tólebı, Arys, Saryaǵash, Jetisaı, Shardara aýdandaryndaǵy iri saýda oryndarynda áleýmettik buryshtar ashylyp, turaqtandyrý qory qoımasynan azyq-túlik ónimderi jetkizilýde. Al, Túrkistan qalasynda áleýmettik dúkender sanyn kóbeıtý maqsatynda jańadan 17 dúken salyndy. Qazir qalada jalpy 36 áleýmettik dúken bar. Onyń toǵyzy «Túrkistan» ÁKK» AQ esebinen salynsa, segizin jeke kásipkerler óz qarajaty esebimen iske qosqan. Sondaı-aq «Túrkistan» ÁKK» AQ jańa qala móltek aýdanynan qosymsha 6 áleýmettik dúken salyp, paıdalanýǵa berdi.
«Jyl basynan beri aptasyna 2 ret seısenbi jáne beısenbi kúnderi Túrkistan qalasyndaǵy «Qýanysh» jáne «Altynbulaq» bazarlarynda azyq-túlik jármeńkesi turaqty túrde ótkizilip turady. Onda taýarlar bazar baǵasynan 20-30 paıyzǵa arzan satylymǵa shyǵýda. Sondaı-aq «Túrkistan» ÁKK» AQ-na qarasty 36 áleýmettik dúkende jáne 4 iri saýda úıleri men 25 saýda orynda uıymdastyrylǵan áleýmettik buryshtarda 19 túrli azyq-túlik taýarlary satylýda. Aldaǵy ýaqytta Túrkistan qalasynda áleýmettik dúkenderdi 50-ge deıin ulǵaıtý josparlanyp otyr», - delingen ákimdik aqparatynda.
