Túrkistanda 300-den astam mektep Starlink ınternetine qosyldy

TÚRKІSTAN. KAZINFORM – Túrkistan oblysynda demografııalyq ósim joǵary jáne mektepterde 35 myń oqýshy orynǵa tapshylyq bar. Bul týraly oblys ákimi Darhan Satybaldy aıtty.

Atalǵan máseleni sheshý úshin bıyl óńirde 50 mektep salynyp jatyr. Onyń ishinde 29 nysan «Jaıly mektep» jobasy aıasynda soǵylýda. Nátıjesinde, mekteptegi oryn tapshylyǵy men apatty jáne aýysymdy mektepter máselesi sheshiledi.

«Bıyl alǵash ret kópten beri jóndeý kórmegen 300-den astam mektepterge jańǵyrtý jumystary júrgizildi – 193 mektepte josparly jóndeý, 107 mektepti gazǵa aýystyrý, 16 mektepke kúrdeli jóndeý jasaldy. Bul maqsatqa bıýdjetti únemdeı otyryp, 12 mlrd teńgeden astam qarajat bóldik. 330 mektep joǵary jyldamdyqty Starlink spýtnıktik ınternet tehnologııasymen qamtyldy», - edi D. Satybaldy Ortalyq kommýnıkatsııalar qyzmetinde ótken baspasóz máslıhatynda.

Sondaı-aq, ákimniń aıtýynsha, bıyl oblystaǵy qurylys kólemi 343 mlrd. teńgege jetip, 131% ósimdi kórsetti. Bıyl oblysta kezekte turǵan 5 myńnan asa otbasynyń baspana máselesi sheshiledi.

Aıta keteıik, respýblıkadaǵy kópbalaly otbasylardyń tórtten biri Túrkistan oblysyna tıesili. Munda eńbekke qabiletti jastardyń úlesi mol. Sondyqtan Túrkistanda shetelge jumys kúshterin daıyndaıtyn Arnaıy ortalyq ashyldy. Bul ortalyq Ulybrıtanııa jáne Ońtústik Koreıada jumys istegisi keletin azamattardy oqytyp, daıyndaıdy.

Oblystaǵy ındýstrııalyq aımaqtarǵa qolaıly jaǵdaı jasaý maqsatynda ındýstrııalyq aımaqtarda elektr energııasy tarıfi 47 teńgeden 25 teńgege deıin arzandatyldy. 

Sondaı-aq, Túrkistan oblysynda zamanaýı mal bırjasy, bordaqylaý kesheni, et ónimderin tereń jáne qaıta óńdeý baǵytynda 5 jańa joba júzege asady.