Túrkistanda 3 mlrd teńgeden astam bıýdjet qarjysyn jymqyrǵan 27 adamǵa úkim shyqty
ASTANA. KAZINFORM — Túrkistanda 3 mlrd teńgeden astam bıýdjet qarajatyn jymqyrǵan uıymdasqan qylmystyq toptyń 27 múshesi sottaldy.
Olardyń árqaısysyna qylmystaǵy róline qaraı 6 jyldan 8 jylǵa deıin bas bostandyǵynan aıyrý jazasy taǵaıyndaldy.
Qarjylyq monıtorıng agenttiginiń Túrkistan oblysy boıynsha departamenti 2016–2021 jyldary «KT ıAssy Nesıe» JShS basshylyǵy «Agrarlyq nesıe korporatsııasy» AQ-nyń iri qara mal satyp alýǵa arnalǵan agrobıznesti qoldaý baǵdarlamasy aıasynda bólingen qarajatyn jymqyrý shemasyn uıymdastyrǵanyn anyqtady.
— Nesıe alý maqsatynda jalǵan tulǵalardyń atyna jalǵan sharýa qojalyqtary men jeke kásipkerler tirkelgen. Ótinimderge qoldan jasalǵan bıznes-josparlar, quqyq belgileıtin qujattar jáne is júzinde joq kepil múlki qosa usynylǵan.
Nesıeleý mamandary qajetti qujattardy ázirlep, jalǵan nesıelik qorytyndylardy, tekserý aktilerin jáne qarajattyń maqsatty paıdalanylǵany týraly qujattardy rásimdeý arqyly nesıeniń zańdy túrde berilgeni týraly jalǵan kórinis qalyptastyrǵan.
Baǵalaýshylar men kepildik qamtamasyz etý mamandary múlikti baǵalaý týraly jalǵan esepter jasap, shyn máninde joq nemese kórsetilgen qunyna sáıkes kelmeıtin múliktiń bar ekenin rastaǵan. Al notarıýstar aqshalaı syıaqy úshin kepilge qoıylatyn múlikke qatysty jalǵan qujattardy kýálandyrǵan, — delingen QMA habarlamasynda.
Tergeý barysynda 33 qylmystyq quqyq buzýshylyq faktisi anyqtaldy. 24 jalǵan nesıe rásimdelip, kepil retinde is júzinde joq 54 nysan usynylǵan.
Sot sheshimimen memleket kirisine 19 turǵyn úı, 10 jer ýchaskesi, 2 páter, 4 kommertsııalyq úı-jaı jáne 4 avtokólik tárkilendi.
Sot úkimi zańdy kúshine engen joq.
Eske salsaq QMA Abaı oblysynda zańsyz metall óndirýmen aınalysqan topty áshkerelegen edi.
