Túrkistanda 26 jer ýchaskesi 83 mln teńgege negizsiz satyp alynǵan

TÚRKІSTAN. KAZINFORM — Túrkistan oblysynda jalǵan qujatpen 2 myń gektar jer rásimdelip, memleketke 314 mln teńge zalal keltirildi, jalpy quny 2 mlrd teńgeden asatyn jer memleketke qaıtaryldy. 

Oblystyq prokýratýranyń málimetinshe, 2025 jyly tekserý barysynda jer qatynastary salasynda jer ýchaskelerin memlekettik menshikten zańsyz shyǵarý boıynsha birqatar zań buzý anyqtalǵan.

— Saýran aýdanynda jalǵan qujat negizinde 2 myń gektar aýyl sharýashylyǵy maqsatyndaǵy jerdi rásimdeý shemasy anyqtaldy. Memleketke keltirilgen zalal kólemi — 314 mln teńge. Zań buzǵandardyń ústinen QK-niń 190-baby 4-bóligi 2-tarmaǵy boıynsha qylmystyq is qozǵaldy. Sonymen qatar memlekettik menshikten 1,4 gektar jer ýchaskesin zańsyz shyǵarý faktisi tergelip jatyr. Bul ýchaske aýyldyq okrýg ákimi qabyldaǵan jalǵan sheshim negizinde 0,1 gektardan 14 bólikke bólinip, jeke tulǵalarǵa berilgen, — delingen prokýratýra usynǵan aqparatta.

Prokýrorlyq qadaǵalaý nátıjesinde jalpy quny 2 mlrd teńgeden asatyn jerler memlekettik menshikke qaıtarylǵan, onyń ishinde aýktsıon ótkizilmesten sheteldik kompanııaǵa berilgen 604,7 ga jer (1,5 mlrd teńge) de bar.

— Sondaı-aq Túrkistan qalasy men Saıram aýdanynda jerdi tıimsiz paıdalaný jáne zańsyz shyǵarý faktileri áshkerelendi. Túrkistanda 26 ýchaske 83 mln teńgege negizsiz satyp alynsa, memlekettik muqtajdyq úshin satyp alynǵan 30 ýchaskege naryqtyq baǵadan artyq soma tólengen, — dep habarlady vedomstvo.

Budan buryn Pavlodar oblysynyń prokýratýrasy 6,5 mlrd teńgeniń múlkin memleketke qaıtarǵanyn jazǵan edik.