Túrkistanda 18 jastaǵy qyzdy zorlady degen kúdikke ilingen úsh polıtseı qyzmetinen bosatyldy

TÚRKІSTAN. KAZINFORM – Túrkistan qalasynyń 18 jastaǵy turǵynynyń aryzy boıynsha jynystyq qatynasqa májbúrleý faktisimen qylmystyq is qozǵaldy. Tergeý barysy Іshki ister mınıstrliginiń erekshe baqylaýyna alyndy.

Áleýmettik jelilerde Túrkistan oblysynda ishki ister salasynda qyzmet atqarǵan úsh polıtsııa qyzmetkerine qatysty aýyr qylmys jasaǵany jóninde aqparat tarady. Onda polıtseıler zorlaý deregi boıynsha kúdikke ilinip, qyzmetten birden bosatylǵany habarlanǵan.

Osyǵan qatysty resmı túsinik bergen Іshki ister mınıstrliginiń resmı ókili Shyńǵys Alekeshev atalǵan derek boıynsha jynystyq qatynasqa májbúrleý faktisimen qylmystyq is qozǵalǵanyn habarlady.

– Burynǵy polıtsııa qyzmetkerleriniń qatysy bary týraly aqparat tolyq kólemde tekseriledi jáne sotqa deıingi tergeý aıasynda túbegeıli quqyqtyq baǵa beriledi. Sonymen qatar qyzmettik tekserý nátıjesimen atalǵan polıtseıler qyzmetke kir keltirgeni úshin teris sebeptermen ishki ister organdarynan shyǵarylǵan, – dep málimdedi mınıstrliktiń resmı ókili.

Qazirgi ýaqytta tergeý organdary istiń barlyq mán-jaıyn jan-jaqty, tolyq ári obektıvti anyqtaýǵa baǵyttalǵan protsessýaldyq is-sharalar keshenin júzege asyryp jatyr.

Qylmystyq istiń tergelý barysy Іshki ister mınıstriniń erekshe baqylaýynda.

Aıta keteıik, jynystyq sıpattaǵy qylmys úshin jaýapkershilikti kúsheıtý máselesi buǵan deıin Parlament deńgeıinde de kóterilgen. Májilis depýtaty Murat Ábenov zorlaý qylmysyn asa aýyr qylmystar sanatyna jatqyzyp, jazanyń eń joǵary merzimin 15 jylǵa deıin bas bostandyǵynan aıyrý jóninde usynys aıtqan bolatyn.