Túrkistanda 17 jastaǵy jasóspirim qaza tapqan atysqa qatysty alty adam sottaldy
TÚRKІSTAN. KAZINFORM — Túlkibas aýdanynda atys kezinde jasóspirimniń qaza bolýyna qatysty sot úkimi shyqty. Oqıǵa kezinde 17 jastaǵy Tórehan Tóreáli kóz jumyp, taǵy úsh adam jaraqattanǵan. Sot aldynda alty aıyptalýshy jaýap berdi.
Basty aıyptalýshyǵa qylmysty qaıtalap jasaǵany eskerilip, 20 jyl bas bostandyǵynan aıyrý jazasy taǵaıyndaldy. Taǵy ekeýiniń árqaısysy 18 jylǵa sottaldy.
Qylmysty jasyrýǵa qatysy bar eki aıyptalýshynyń biri 3 jylǵa, ekinshisi 2 jylǵa bas bostandyǵynan aıyryldy. Taǵy bir sottalýshyǵa 2 jyl 8 aıǵa bas bostandyǵyn shekteý jazasy taǵaıyndaldy. Alaıda oǵan raqymshylyq qoldanylyp, sot zalynan bosatyldy.
Úsh aıyptalýshy oqıǵa ornyna kelip, jábirlenýshilerge qarýdan oq atqan. Qalǵandary shabýylǵa tikeleı qatyspaǵanymen, qarý qoldanylatynyn aldyn ala bilgen jáne bul týraly polıtsııaǵa habarlamaǵan.
Іs boıynsha jetinshi kúdiktige izdeý jarııalandy. Qaza bolǵan jasóspirimniń týystarynyń aıtýynsha, qaıǵyly oqıǵadan beri bir jylǵa jýyq ýaqyt ótse de, ol áli ustalǵan joq.
Tórehannyń týystary sot úkimine jalpy qanaǵattanǵanymen, sottalýshylardyń biriniń raqymshylyqqa ilinip, bosatylǵanyna narazylyq bildirdi. Qaza bolǵan jasóspirimniń anasynyń aıtýynsha, is boıynsha basty aıyptalýshy Samat Shoqanov odan keshirim suraǵan.
Eske salaıyq, oqıǵa 2025 jylǵy 2 qarashaǵa qaraǵan túni Túrkistan oblysynyń Túlkibas aýdanynda bolǵan.
Betperde taqqan er adamdar kólikpen kelip, kóshede turǵan tórt jigitke oq atqan. Kókterek aýylynyń 17 jastaǵy turǵyny Tórehan Tóreáli oqıǵa ornynda qaza tapty, taǵy úsh adam oq jaraqatymen aýrýhanaǵa jetkizildi.
Týystarynyń aıtýynsha, sol túni Tórehan aǵasymen birge dári-dármek alý úshin dárihanaǵa barǵan. Otbasy jasóspirimniń janjalǵa esh qatysy bolmaǵanyn jáne kezdeısoq oqqa ushqanyn málimdegen.
Polıtsııa alǵashqy kúdiktini atystan keıin bir táýlik ishinde ustaǵan. Keıin quqyq qorǵaý organdary qylmystyq is boıynsha izdeýde bolǵan taǵy bir kúdiktiniń ustalǵanyn habarlady.
