Túrkistanda 1,5 tonna dóńgelek qaldyǵyn zańsyz tastaǵandar anyqtaldy
ASTANA. KAZINFORM — Túrkistan oblysynda polıtseıler 1,5 tonna avtokólik dóńgelekteriniń qaldyǵyn zańsyz tastaǵan tulǵalardy anyqtady, dep habarlaıdy QR Іshki ister mınıstrliginiń baspasóz qyzmeti.
Túrkistan qalasynda qoǵamdyq tártipti saqtaý, quqyq buzýshylyqtardyń aldyn alý jáne turǵyndardyń quqyqtyq mádenıetin arttyrý baǵytyndaǵy jumystar júıeli túrde júrgizilip jatyr.
— Profılaktıkalyq is-sharalar barysynda polıtsııa qyzmetkerleri Qyzylorda tasjoly boıynda ornalasqan kólik jelimdeý ortalyǵynyń jumysshylarynyń belgilenbegen orynǵa shamamen 1,5 tonna avtokólik dóńgelekteriniń qaldyǵyn tastaǵanyn anyqtady. Sondaı-aq Táýke han dańǵyly boıynda qurylys qaldyqtaryn ruqsat etilmegen jerge tókken turǵyn belgili boldy, — delingen habarlamada.
Atalǵan derekter tártip saqshylarynyń beınejetonyna tirkelgen. Atalǵan quqyq buzýshylyqtar boıynsha kináli tulǵalarǵa abattandyrý qaǵıdalaryn buzǵany úshin ákimshilik sharalar qoldanyldy.
Tártip saqshylary qala turǵyndaryn tazalyqty saqtaýǵa, qorshaǵan ortaǵa jaýapkershilikpen qaraýǵa jáne belgilengen talaptardy qatań ustanýǵa shaqyrady.
Buǵan deıin Qyzylorda oblysynda 200-ge jýyq zańsyz qoqys orny anyqtalǵanyn jazdyq.
