Túrkistanda 118 jekemenshik mekteptiń qurylys shyǵynyna 5,2 mlrd teńge tólenbegen
TÚRKІSTAN. KAZINFORM — Túrkistan oblysynda 2025 jylǵy qyrkúıek-jeltoqsan aılarynda 118 jekemenshik mektepke qurylys shyǵyndaryn óteýge arnalǵan A2 komponenti boıynsha tólem jasalmaǵan. Bul másele oblystyq Kásipkerler palatasynda ótken jıynda talqylandy.
Kezdesýde jekemenshik mektepterdiń ókilderi 2025 jyldyń sońǵy tórt aıyna tólenbeı qalǵan qarajat máselesin kóterdi. Olardyń aıtýynsha, tólemderdiń keshigýine baılanysty mektep qurylysyna alǵan nesıeleri boıynsha mindettemelerin óteýde qıyndyqtar týyndaǵan.
Osy máselege qatysty Túrkistan oblysynyń bilim basqarmasy túsinik berdi.
Vedomstvo málimetinshe, qazirgi tańda 2026 jyldyń qańtar-mamyr aılary boıynsha jekemenshik mektepterge bereshek joq. Al 2025 jylǵy qyrkúıek-jeltoqsan aılarynda A2 komponenti boıynsha 118 jekemenshik mektepke tólemder júrgizilmegen. Onyń jalpy somasy — 5,2 mlrd teńge.
— Bul jaǵdaı E-Qazyna portalyndaǵy qajetti aqparattyq júıelerdiń ýaqtyly ıntegratsııalanbaýyna baılanysty týyndaǵan. Qalyptasqan bereshekti óteýdiń quqyqtyq tetigin belgileý maqsatynda tıisti normatıvtik-quqyqtyq aktilerge ózgerister men tolyqtyrýlar engizý máselesi qaralyp jatyr, — delingen bilim basqarmasynyń jaýabynda.
Sonymen qatar, QR Premer-mınıstriniń birinshi orynbasary N. Nálibaevtyń tapsyrmasyna sáıkes, jekemenshik mektepterdiń A2/A3 komponentteri boıynsha buryn tólengen qarajattarǵa óńirlik komıssııa taldaý júrgizip jatyr.
— Taldaý jumystarynyń qorytyndysy boıynsha qalyptasqan jaǵdaıdy retteý jóninde tıisti usynystar engiziledi, — dep málimdedi vedomstvo.
Buǵan deıin Túrkistan oblysynda 5700-den astam qyzmetkerge MÁMS jarnalary tólenbegeni habarlanǵan bolatyn.
