Túrkistan oblysynda 103 mln teńge sýbsıdııany jymqyrý isi sotqa joldandy
ASTANA. KAZINFORM — Qarjylyq monıtorıng agenttigi Túrkistan oblysy boıynsha departamenti memlekettik sýbsıdııalardy jymqyrdy degen kúdikke ilingen qylmystyq topqa qatysty tergeýdi aıaqtady.
Tergeý nusqasyna sáıkes, zańsyz shemany iske asyrý úshin úshinshi tulǵalardyń atyna resmı túrde tirkelgen 4 jeke kásipkerlik, «Nur-Keles» JShS jáne «Bımen S.» JShS paıdalanylǵan. Bul kásipkerlik nysandaryn kúdiktiler ózderine berilgen elektrondyq tsıfrlyq qoltańbalar, mórler jáne bank shottaryn basqarýǵa quqyq beretin notarıaldy senimhattar arqyly is júzinde baqylaýda ustaǵan.
— Atalǵan kásipkerlik nysandary arqyly aqparattyq júıelerge aýyl sharýashylyǵy janýarlaryn satyp alý men olardyń qolda bary, sondaı-aq asyldandyrý jumystarynyń júrgizilgeni týraly kórineý jalǵan málimetter engizilgen. Keıin osy málimetterdiń negizinde sýbsıdııa alýǵa elektrondyq ótinimder berilgen. Bıýdjetten alynǵan qarajat qolma-qol aqshaǵa aınaldyrylyp, shemaǵa qatysýshylar arasynda bólingen jáne jeke maqsattaryna jumsalǵan, — delingen habarlamada
Keltirilgen zalaldyń jalpy kólemi — 103 mln teńge. Sonyń saldarynan adal aýyl sharýashylyǵy taýaryn óndirýshilerdi qoldaýǵa jáne óńirdegi mal sharýashylyǵyn damytýǵa arnalǵan bıýdjet qarajaty maqsatsyz jumsalǵan.
Sot sanktsııasymen kúdiktilerdiń múlkine tyıym salyndy. Olardyń qatarynda 2 turǵyn úı, 4 avtokólik, avtoturaq orny jáne jer telimi bar.
Kúdiktilerdiń biri qamaýǵa alyndy, ekinshisine kepil túrindegi bultartpaý sharasy qoldanyldy. Qylmystyq-protsestik kodekstiń 201-babyna sáıkes ózge aqparat jarııalaýǵa jatpaıdy.
Eske salaıyq, buǵan deıin Aqmolada eki basshy mal derekterin jalǵan engizip, 50 mln teńgeden astam sýbsıdııa alǵanyn jazǵan edik.
