Túrkistan túrki birligin aıshyqtaıtyn sammıtke qalaı daıyndalyp jatyr

Búginde qala kósheleri tazartylyp, abattandyrý jumystary tolyq aıaqtalǵan. Qala aýmaǵynda Túrki memleketteri uıymyna múshe elderdiń týlary jelbirep, baýyrlas halyqtardyń birligi men ortaq rýhanı baılanysyn aıshyqtap tur.

Bıylǵy sammıttiń Túrkistanda ótýi de kezdeısoq emes. Tarıhy tereń, túrki halyqtarynyń ortaq mádenıeti men rýhanı tamyryn toǵystyrǵan shahar búginde túrki áleminiń saıası ári mádenı yqpaldastyǵyn nyǵaıtatyn mańyzdy ortalyqqa aınalyp keledi.

Alqaly jıynnyń basty taqyryby — «Jasandy ıntellekt pen tsıfrlyq damý». Sammıtke uıymǵa múshe jáne baqylaýshy memleketterdiń basshylary, halyqaralyq uıymdar men túrki ıntegratsııalyq ınstıtýttarynyń jetekshileri qatysady dep josparlanǵan.

Іri halyqaralyq is-shara qarsańynda qaýipsizdik sharalary da kúsheıtilgen. Qalada polıtsııa, Ulttyq ulan, prokýratýra, UQK, Memlekettik kúzet qyzmeti, tótenshe jaǵdaılar departamenti, áskerı bólimder jáne ózge de qurylym ókilderi kúsheıtilgen rejımde jumys istep jatyr.

Túrkistanǵa Almaty, Shymkent qalalary men Aqtóbe, Jambyl, Qyzylorda oblystarynan qosymsha tártip saqshylary tartylǵan.

Ulttyq ulan sarbazdary men Qorǵanys mınıstrliginiń áskerı qyzmetkerleri de qaýipsizdikti qamtamasyz etýge jumyldyryldy. Qalanyń alty baǵytynda arnaıy baqylaý beketteri qoıylyp, kólik quraldary tekserilip jatyr.

— Túrkistan qalasy arqyly respýblıkalyq mańyzy bar Samara — Shymkent tasjoly ótedi. Ol jolmen tranzıttik kólikter qatynaıtyndyqtan arnaıy aınalma baǵyttar qarastyryldy. Sondyqtan negizgi shekteýler Sattarhanov dańǵyly men «Kerýen saraı» mańynda engiziledi, — dedi ІІM Ákimshilik polıtsııa komıteti tóraǵasynyń orynbasary Baǵlanbek Aıtbaev.

Qazir qaýipsizdik qurylymdary sońǵy daıyndyq jumystaryn pysyqtap, arnaıy tehnıkanyń daıyndyǵyn tekserip jatyr. Resmı delegatsııalardy tasymaldaıtyn qyzmettik kólikter de tolyq ázirlengen.

— Sammıt ótetin 16 nysanǵa arnaıy júrdek avtokólikter men órt sóndirý tehnıkalary kezekshilikke qoıyldy. Sonymen qatar bir arnaıy avıatsııa borty bólindi. Qyzylorda oblysynan qosymsha ushaq tartylady. Jalpy qaýipsizdik osy tehnıkalar arqyly qamtamasyz etiledi, — dedi oblystyq TJD bastyǵynyń orynbasary Asqar Seısenov.

Sammıt qarsańynda Túrkistannyń kireberisine alyp Taıqazan kompozıtsııasy ornatyldy. Bul nysan túrki halyqtarynyń birligi men berekesiniń sımvoly retinde boı kótergen. Erekshe sáýlettik sheshimmen jasalǵan kompozıtsııany áýeden qaraǵanda Túrki memleketteri uıymy týynyń beınesi kórinedi.

Ereksheligi sol, jańa taıqazan Qoja Ahmet ıAsaýı kesenesi aýmaǵyndaǵy tarıhı taıqazannan bes ese úlken.

— Kompozıtsııanyń bıiktigi — 10,4 metr, dıametri — 12 metr. Nysan metallokonstrýktsııa negizinde salynyp, syrtqy bóligi shyny talshyqpen qaptalǵan, — dedi Túrkistan qalasy ýrbanıstıka ortalyǵy dırektorynyń ýaqytsha mindetin atqarýshy Nursultan Qalmyrza.

Sonymen qatar shaharda ulttyq mádenıetti dáripteýge jáne týrızm ınfraqurylymyn damytýǵa baǵyttalǵan jańa etnotýrıstik keshen paıdalanýǵa berildi.

Jalpy aýmaǵy 707 sharshy metr bolatyn keshenniń basty nysany — dıametri 31 metr, bıiktigi 15,5 metrge jetetin alyp kıiz úı.

Munda forýmdar, etnofestıvalder, halyqaralyq kórmeler men mádenı sharalar ótkizý josparlanǵan. Keshen aýmaǵynda shaǵyn kıiz úıler de ornalastyrylǵan.

Túrkistandaǵy qolónershiler qalashyǵy da halyqaralyq jıynǵa tolyq daıyn. Sammıt aıasynda shetelden kelgen 17 qolónershiniń týyndylary mártebeli meımandar nazaryna usynylady.

Qala ákimdiginiń málimetinshe, Túrkistandaǵy 70-ke jýyq qonaqúı men ornalastyrý orny sheteldik jáne otandyq delegatsııalardy qabyldaýǵa ázir.

Tarıhı jıyn 1 myń adamǵa arnalǵan Kongress hollda ótedi.

Budan buryn Túrkistanǵa 4 óńirden patrýldik polıtsııa qyzmetkerleri kómekke kelgenin jazǵan edik. Sonymen qatar qala aýmaǵynda dron ushyrýǵa ýaqytsha tyıym salyndy. 

Qoja Ahmet ıAsaýı kesenesi 14-15 mamyr kúnderi ýaqytsha jabylyp, birqatar kóshelerde kólik qozǵalysy shekteldi. 

Osy eki kún Túrkistandaǵy mektepter men kolledjder onlaın oqytýǵa kóshedi.