«Túrkistan – túrki áleminiń rýhanı astanasy» atty derekti fılmder toptamasy Túrkııada kórsetildi
YSTANBUL. KAZINFORM — Qazaqstannyńı Ystanbuldaǵy Bas konsýldyǵynyń bastamasymen jáne úılestirýimen Túrkııanyń jetekshi medıa qurylymdarynyń biri – «İhlas Yayın Holding» holdıngine qarasty TGRT Belgesel telearnasynyń túsirilim toby Túrkistan qalasyna arnaıy sapar jasady. Bul týraly Mádenıet jáne aqparat mınıstrligi málim etti.
Іs-sapardyń negizgi maqsaty — Qazaqstannyń týrıstik áleýetin keńinen tanystyrý jáne Túrkistandy túrki áleminiń rýhanı ortalyǵy retinde halyqaralyq aýdıtorııaǵa nasıhattaý boldy.
Vedomstvonyń málimetinshe, sapar barysynda telearna ókilderi Túrkistan qalasynyń mádenı jáne tarıhı nysandarynda túsirilimder júrgizip, Qoja Ahmet ıAsaýı kesenesi, jańa ákimshilik-iskerlik ortalyq, týrıstik aımaqtar jáne kıeli oryndardy qamtyǵan birqatar sıýjetter ázirlegen.
Túsirilim nátıjesinde Túrkistannyń tarıhı jáne mádenı murasyn qamtıtyn 5 derekti reportaj daıyndaldy. Baǵdarlamalar TGRT Belgesel telearnasynyń praım-taım efırinde qaıtalana kórsetilýde. Bul Qazaqstannyń týrıstik ımıdjin Túrkııadaǵy telekórermenderge tanystyrýǵa jáne onyń rýhanı astana retindegi mańyzyn aıshyqtaýǵa múmkindik berdi.
— Túrkistan — búkil túrki álemi úshin tarıhı ári rýhanı mańyzy zor qala. Biz úshin bul qasıetti mekenniń mádenıeti men tarıhı qundylyǵyn Túrkııa kórermenine jetkizý úlken mártebe boldy. Osy sapar eki el arasyndaǵy mádenı baılanystardy odan ári nyǵaıtady degen úmittemiz, — dep atap ótti TGRT Belgesel telearnasynyń bas redaktory Saıt Eken.
Atalmysh joba eki el arasyndaǵy mádenı-gýmanıtarlyq baılanystardy keńeıtip, týrızm salasyndaǵy yntymaqtastyqty nyǵaıtýyna septigin tıgizýde. Túrik BAQ-tarynyń qyzyǵýshylyǵy Qazaqstanǵa sapar shegýge nıetti aýdıtorııanyń artýyna oń áser etetinine jáne túrik qoǵamynda elimiz týraly aqparattyq tanymdylyqty kúsheıte túsetindigi aıqyn.
Aıta keteıik, Májilis Túrkistan qalasynyń erekshe mártibesi týraly zańdy qabyldady.