Túrkistan turǵyny 40 jasynda úshem bosandy
TÚRKІSTAN. KAZINFORM - Úsh ulǵa týystary Narıman, Nurıman jáne Nurman esimderin qoıdy.
Báıdibek aýdanynyń 40 jastaǵy turǵyny, kópbalaly ana Jansaýle Dospanova úsh uldy dúnıege alyp keldi. Qazirgi tańda merziminen buryn týǵan sábılerdiń jaǵdaıy qalypty. Nárestelerge jansaqtaý bóliminiń mamandary tarapynan da erekshe kútim jasalǵan.
Jansaýle Dospanova úshem bosanatynyn alǵash estigen kezde qatty qobaljyǵanyn aıtady. Al, keıinnen dárigerler kesar tiligi arqyly ota jasaǵan.
«Kútpegen jerden dárigerge qaralyp, úshemdi bolatynymdy estigende basqasha sezimde boldym. Jalpy, 5 balaly bolǵan soń, sábıli bolýdy josparlamaǵanbyz», - deıdi ol.
Úshemderge týystary Narıman, Nurıman jáne Nurman esimderin qoıdy.
Aıta keteıik, Túrkistan oblysynyń №2 perınataldyq ortalyǵynda 2024 jyly 24 egiz ben 1 úshem dúnıege keldi.
