Túrkistan turǵyny 35 jasynda alǵash ana atanyp, úshem dúnıege ákeldi
TÚRKІSTAN. KAZINFORM — Túrkistan oblysynda taǵy da úshem dúnıege keldi. Sábılerge ata-anasy Fatıma, Zýhra jáne Hasan esimderin berdi.
Tólebı aýdanynda 35 jastaǵy kelinshek alǵash ret ana atanyp, úshemdi ómirge ákeldi. Úshemder Túrkistan oblystyq № 1 perınataldyq ortalyǵynda dúnıege kelgen. Dárigerler júktiliktiń 35 aptasynda ota jasap, sábılerdi aman-esen bosandyryp aldy.
Oblystyq densaýlyq saqtaý basqarmasynyń málimetinshe, nárestelerdiń biri 2120, ekinshisi 1610, al úshinshisi 2190 gramm salmaqpen týǵan. Sábılerge ata-anasy Fatıma, Zýhra jáne Hasan esimderin berdi.
Dárigerlerdiń aıtýynsha, júktilik kúrdeli ótken. Áıelde aýyr dárejeli preeklampsııa, úshem júktilik, epıleptıformdy sındrom jáne gestatsııalyq pıelonefrıt sekildi qaýip faktorlary anyqtalǵan. Soǵan qaramastan perınataldyq ortalyq dárigerleriniń kásibı jumysynyń arqasynda ana men nárestelerge der kezinde qajetti medıtsınalyq kómek kórsetildi.
— Qazirgi ýaqytta úshemniń de, anasynyń da jaǵdaıy jaqsy. Náresteler ana sútimen qorektenip jatyr, — delingen habarlamada.
Dárigerler kópten kútken sábılerin qushaǵyna alǵan otbasyn qýanyshpen úılerine shyǵaryp saldy. Jas ana aq halatty abzal jandarǵa alǵysyn bildirdi.
Budan buryn Túrkistan oblysynda Safııa, Sadııa, Samııa esimdi úshem ómirge kelgenin jazǵan edik.
