Túrkistan týraly álemdik deńgeıdegi fılm túsiriledi - Sergeı Dvortsevoı

Túrkistan týraly álemdik deńgeıdegi fılm túsiriledi. Bul týraly rejısser Sergeı Dvortsevoı Túrkistan oblysynyń ákimi Darhan Satybaldymen kezdesýinde aıtty, dep habarlaıdy Kazinform.

Shytyrman drama janryndaǵy tarıhı kınotýyndyǵa shetel ártisteri men Qazaqstannyń kıno juldyzdary qatysady dep josparlanyp otyr. Sondaı-aq, tarıhı tulǵalardyń obrazy da kınodan kórinis tabady. Týyndynyń negizgi bólikteri Túrkistan qalasy men Qarnaq aýylynda túsiriledi. Al, stsenarı ázirge qupııa.

«Bul óte úlken jumys bolmaq. Álemniń birneshe eliniń ókilderi bas qosqan mega jobaǵa daıyndyq jumystary júrgizilip jatyr. Kastıng Qazaqstanda da ótedi. Ózim osy ońtústikte týyp ósken soń bul taqyryp men úshin asa mańyzdy, janyma jaqyn. Sońǵy segiz aıdan beri tarıhı faktilerdi oqyp, ıran, qytaı tilderinde jazylǵan dúnıelermen tanysyp júrmin. Sony jınaqtap, álemdi tań qaldyratyn dúnıe shyǵarýǵa daıynmyn. Bul deńgeıi men sapasy bólek, 2-3 jylda muraǵatqa ketetin emes, jyldar boıy saqtalatyn óshpes týyndy bolady», – dedi Sergeı Dvortsevoı.

Óńir basshysy elimizdiń kınematografııa salasyn damytýǵa úlesin qosyp júrgen jáne onyń álemdik deńgeıde tanymal bolýyna qosqan úlesi úshin kınorejısser Sergeı Dvortsevoıǵa shynaıy alǵysyn bildirdi. Tarıhty dáripteıtin bastamasyna qoldaý kórsetiletinin jetkizdi.