Túrkistan — tarıhı mártebesimen qatar, ınnovatsııalyq damý jolyna bet burǵan zamanaýı qala
TÚRKІSTAN. KAZINFORM — Túrkistan qalasynda turǵyndardyń ómir súrý sapasyn arttyrý, qolaıly jáne zamanaýı ınfraqurylym qalyptastyrý baǵytyndaǵy jumystar kún sanap jandanyp keledi.
Memleket basshysynyń óńirlerdi damytý jónindegi tapsyrmalary men ulttyq jobalar negizinde qolǵa alynǵan áleýmettik jáne ınfraqurylymdyq nysandardyń qurylysy búginde júıeli júrgizilýde. Bul baǵytta Túrkistan qalasy ákimdigi tarapynan aýqymdy jobalar júzege asyrylyp jatyr.
Qala ákimi Ázimbek Pazylbekulynyń bastamasymen júrgizilip jatqan nysandardyń sapaly ári ýaqtyly aıaqtalýyn qamtamasyz etý maqsatynda jaýapty sala basshylary men merdigerlerge naqty tapsyrmalar júktelgen. Jýyrda qala basshysy áleýmettik mańyzy bar birqatar nysandardy aralap, qurylys jumystarynyń barysymen tanysty.
Atap aıtqanda, Muqaǵalı Maqataev kóshesinde boı kóterip jatqan jańa sport kesheniniń jalpy alańy — 826 sharshy metrdi, al jer telimi — 0,186 gektardy quraıdy. Qazirgi tańda bul nysanda qurylys jumystary qarqyndy júrgizilýde. Keshen zamanaýı sporttyq jabdyqtarmen qamtamasyz etilip, dene shynyqtyrý jáne buqaralyq sportty damytýǵa serpin beretin bolady. Bul — salaýatty ómir saltyn nasıhattaý men sport ınfraqurylymyn jetildirýdegi mańyzdy qadam.
Sondaı-aq, ákim 500 orynǵa arnalǵan kórermen zaly bar kópfýnktsıonaldy mádenıet úıiniń qurylys barysyn baqylady. Ǵımarat qazirgi zaman talabyna saı boı kóterip, zamanaýı tehnologııalyq sheshimdermen jabdyqtalmaq. Qazirgi ýaqytta ishki árleý, ınjenerlik-kommýnıkatsııalyq júıelerdi júrgizý jáne akýstıkalyq jabdyqtardy ornatý jumystary júrip jatyr. Qurylys jumystarynyń 90 paıyzy aıaqtalǵan.
Aıta keterlik jaıt, bul mádenıet úıi tsıfrlyq transformatsııany eskere otyryp jobalanǵan. Munda elektrondy kitaphana, dybys jazý stýdııasy, onlaın shyǵarmashylyq sabaqtar ótkizýge múmkindik beretin stýdııalar jáne kovorkıng ortalyqtary bolady. Jańa nysan tek mádenı is-sharalar ótkizetin oryn ǵana emes, ınnovatsııalyq mádenı keńistik retinde de qyzmet atqarady. Atalǵan ınfraqurylym mádenıet pen óner salasyn tsıfrlandyrýǵa jáne jańa býynnyń shyǵarmashylyq áleýetin ashýǵa yqpal etedi.
Qala basshysy qurylys sapasyn, tehnıkalyq talaptar men qaýipsizdik normalaryn qatań saqtaýdy merdigerlerge eskertti. Sonymen qatar, qurylysqa otandyq jáne energııa únemdeıtin ınnovatsııalyq materıaldardy qoldaný qajettigine toqtaldy. Qazirgi ýaqytta nysandarda «aqyldy júıeler» engizilýde. Bul — jaryqtandyrýdy avtomatty basqarý, beınebaqylaý, jylytý jáne jeldetý júıelerin tsıfrlyq negizde qashyqtan baqylaýǵa múmkindik beredi. Mundaı sheshimder qalanyń ıntellektýaldyq ınfraqurylymyn damytýdyń negizin qalyptastyrady.
Jańa nysandarda «Smart City» kontseptsııasy elementteri kezeń-kezeńimen engizilýde. Atap aıtqanda, jańadan salynǵan nysandarǵa beıimdelgen ıntellektýaldy ınfraqurylym jobalary boıynsha beınebaqylaý, órt qaýipsizdigi, dybystyq habarlama júıesi, Wi-Fi jelisi jáne QR-kod arqyly aqparattyq qyzmetter kórsetiletin bolady.
Jalpy, Túrkistan qalasynda júzege asyrylyp jatqan bul qurylys jumystary — qala turǵyndarynyń ál-aýqatyn arttyrýmen qatar, tsıfrlandyrý jáne ınnovatsııalyq ınfraqurylymdy damytý baǵytyndaǵy naqty qadamdar. Mundaı keshendi jobalar tek sáýlettik beınesin ǵana emes, qalanyń áleýmettik-ekonomıkalyq áleýetin de arttyrýǵa yqpal etedi.
Qazirgi tańda Túrkistan qalasynda áleýmettik, bilim berý, sport jáne mádenıet salalary boıynsha birneshe nysannyń qurylysy men kúrdeli jóndeý jumystary júrgizilýde. Olardyń barlyǵy turǵyndardyń ómir súrý sapasyn jaqsartýǵa, jastardyń shyǵarmashylyq áleýetin ashýǵa jáne tsıfrlyq qoǵamǵa beıimdelgen jańa múmkindikter usynýǵa baǵyttalǵan.
Túrkistan — tarıhı mártebesimen qatar, ınnovatsııalyq damý jolyna bet burǵan zamanaýı qala. Infraqurylymdyq jobalar men tsıfrlyq tehnologııalardyń úılesimdi túrde damýynyń arqasynda shahar keleshekte Ortalyq Azııadaǵy ıntellektýaldy ýrbanıstıka úlgisine aınalýǵa áleýetti.