Túrkistan: Shardaradaǵy jaǵajaılardyń tazalyǵy men qaýipsizdigi boıynsha qatań talaptar qoıyldy
TÚRKІSTAN. KAZINFORM – Túrkistan oblysynyń ákimi Nuralhan Kósherov Shardara aýdanyna jumys saparymen baryp, «Shardara» sý qoımasy mańyndaǵy jaǵajaılardy aralap kórdi. Týrıstik nysandardyń jaı-kúıimen tanysyp, sanıtarlyq tazalyq jáne qaýipsizdik talaptaryna sáıkestin qadaǵalady. Jaýapty tulǵalarmen, jaǵajaı jumysyn júrgizip jatqan kásipkerlerge anyqtalǵan kemshilikter boıynsha syn-eskertpe aıtyp, naqty tapsyrma berdi.
Týrıster jıi baratyn negizgi oryndar – «Nurdelux», «ER I ZHAN», «Altyn jaǵalaý» jáne ózge de demalys oryndary demalýshylardyń nazaryn kóbirek aýdaryp otyr.
– Memleket basshysy eldegi barlyq týrıstik baǵyttyń jaǵdaıyn retke keltirýdi tapsyrdy. Bul másele nazarymyzdan túsken emes. Óńirde týrıstik oryndardy retteý, sanıtarlyq tazalyǵyn saqtaý boıynsha eki jyldan naqty tapsyrmalar berilip, jumystar atqarylyp keledi. Biraq áli de kemshilik kóp. Jaǵajaılardy jedel retke keltirińizder. Tazalyq, qaýipsizdik talaptaryn saqtamaǵandaryna zań sheńberinde jumys júrgizilsin. Osy demalys oryndaryna ıelik etip otyrǵan kásipkerler óz mindetin adal atqarsyn. Jaǵajaılarǵa qajetti talaptar saqtalmasa, kelisimshartty toqtatý kerek. Jaýapty basqarma basshylary, aýdan ákimdiginiń jaýapty tulǵalary osy másele boıynsha shuǵyl jumys atqaryńyzdar. Demalys oryndarynda tirkelgen jumysshylar sanyn, salyq tólemderin de júıeleńizder. Eń basty másele – demalýshylardyń qaýipsizdigi. Eger týrızm damysyn desek, tazalyq pen qaýipsizdik basty nazarda bolýy kerek. Jaǵajaıǵa kelýshilerdiń tazalyq talaptaryn saqtaýy da qadaǵalansyn, – degen Nuralhan Kósherov jaýapty basshylarǵa naqty mindetter júktedi.
Jaǵajaılardy aralap kórgen oblys ákimi aýdan ákimdiginiń ǵımaratynda jaǵajaılar men týrıstik nysandardyń jumysyn retteý boıynsha májilis ótkizdi.
– Týrıstik nysandar – bizdiń kelbetimiz. Memleket basshysy osy baǵytta naqty mindetter júktep otyr. Jańa jaǵajaılardy aralap shyqtyq. Qaýipsizdik, tazalyq boıynsha kemshilikterdi kórdik. Tótenshe jaǵdaıǵa jaýapty mekemeler jumysty kúsheıtip, kemshilikterdi joıýy kerek. Polıtsııa tarapynan tazalyq talaptarynyń oryndalýy, alkogoldi ishimdikterdiń satylmaýy, jalpy tártiptiń saqtalýy qadaǵalansyn. Turǵyndardyń qaýipsizdigi – eń basty másele. Ekinshiden, osy týrıstik nysandardyń salyq tólemderine qatysty da suraqtar bar. Jergilikti kirister basqarmasy jumysty shıratsyn, – degen Nuralhan Kósherov «Qazsýshar» mekemesi men Shardara aýdany ákimdigine jáne Túrkistan oblysynyń tabıǵı resýrstar jáne tabıǵat paıdalanýdy retteý basqarmasyna demalys oryndaryn tirkeý, zańdylyǵyn saqtaý boıynsha tıisti tapsyrmalar berdi.
Týrızmge jaýapty salǵyrttyqqa jol bergen basshylar pen qyzmetkerlerge tıisti tártiptik shara kórýdi mindettedi. Sonymen birge jaǵajaılarda qutqarýshylar sanyn kóbeıtý, sýǵa tym jaqyn ornalasqan sákilerdi talapqa saı alystatý, avtoturaqty retteý jáne ózge de tapsyrmalar berildi. Monıtorıng jumystary turaqty jalǵasady.
Túrkistan oblysynda alǵash ret 32 myń gektar jerge tamshylatyp sýǵarý júıesi engizildi.