Túrkistan – Pavlodar jolaýshylar poıyzynyń jolseriginen 5 keliden astam gashısh tárkilendi
ASTANA. KAZINFORM - Kóliktegi polıtsııa qyzmetkerleri ońtústik óńirlerden elordaǵa esirtki jetkizý arnasynyń jolyn kesti. Zańsyz aınalymǵa qatysy bar degen kúdikpen eki adam ustalǵan.
Kóliktegi polıtsııa departamentiniń qyzmetkerleri jedel-izdestirý is-sharalary barysynda temirjol salasy qyzmetkerleriniń qatysýymen esirtki quraldarynyń zańsyz aınalymy faktisin anyqtady.
- Bıyl qazan aıynda «Túrkistan – Pavlodar» baǵytyndaǵy jolaýshylar poıyzynyń 39 jastaǵy jolserigi ustaldy. Onyń turǵylyqty jerin tintý kezinde 5 keliden astam gashısh tárkilendi. Odan ári júrgizilgen jedel-izdestirý sharalary nátıjesinde esirtkini jetkizýshi degen kúdikke ilingen 33 jastaǵy Jambyl oblysynyń týmasy anyqtalyp, qolǵa tústi. Tergeý deregine sáıkes, ol esirtki zattaryn aqshalaı syıaqy úshin ótkizgen, - dep habarlady Kóliktegi polıtsııa departamenti.
Aldyn ala baǵalaý boıynsha, tárkilengen esirtkiniń qara naryqtaǵy quny 18 mıllıon teńgeden asady. Osylaısha, polıtseıler elimizdiń ońtústik óńirlerinen elordaǵa esirtki jetkizý arnasynyń jolyn kesti.
Atalǵan derek boıynsha QR Qylmystyq kodeksiniń 297-babymen sotqa deıingi tergep-tekserý bastaldy.
Qazirgi ýaqytta istiń barlyq mán-jaıyn anyqtaý, sondaı-aq esirtkiniń zańsyz aınalymyna qatysy bolýy múmkin ózge de tulǵalardy anyqtaý maqsatynda tergeý jáne jedel-izdestirý sharalary júrgizilip jatyr.
Eske sala keteıik, Pavlodarda kolonııaǵa jiberilgen tis pastasynyń ishinen esirtki tabyldy.
