Túrkistan oblystyq dene shynyqtyrý basqarmasyna jańa basshy taǵaıyndaldy
TÚRKІSTAN. KAZINFORM - Bul qyzmetti budan bylaı Hýdııarov Ǵalymjan Batyrhanuly atqarady.
Túrkistan oblysynyń ákimi Nuralhan Kósherovtyń ókimimen jáne QR Týrızm jáne sport mınıstrliginiń kelisimimen Túrkistan oblystyq dene shynyqtyrý jáne sport basqarmasynyń basshysy laýazymyna Hýdııarov Ǵalymjan Batyrhanuly taǵaıyndaldy.
Túrkistan oblysy ákiminiń orynbasary Ertaı Altaev ujymǵa jańa basqarma basshysyn tanystyryp, jumysyna sáttilik tiledi.
Hýdııarov Ǵalymjan Batyrhanuly – Túrkistan qalasynda 1983 jyly dúnıege kelgen. Ol 2000-2004 jyldary Q.A. ıAsaýı atyndaǵy halyqaralyq qazaq-túrik ýnıversıtetinde «Dene tárbıesiniń muǵalimi jáne jattyqtyrýshysy» mamandyǵy boıynsha bilim aldy. Pedagogıka jáne psıhologııa magıstri, 2010 jyly pedagogıka ǵylymdarynyń kandıdaty boldy.
Eńbek jolyn 2005-2006 jyldary Á.Nurmahanov atyndaǵy OBJSM sambo kúresinen jattyqtyrýshy bolyp bastady.
2006-2012 jyldary Q.A.ıAsaýı atyndaǵy HQTÝ «Dene shynyqtyrý jáne sport» kafedrasynyń oqytýshysy, 2012-2014 jyldary Q.A.ıAsaýı atyndaǵy HQTÝ-dyń «Sport jáne óner» fakýltetiniń ǵylym jáne tárbıe isi jónindegi dekan orynbasary qyzmetterin atqardy.
2014-2019 jyldary Túrkistan qalalyq sý sporty kesheniniń meńgerýshisi, 2019 jyly Túrkistan oblysy dene shynyqtyrý jáne sport basqarmasyna qarasty «Ortalyq sý-sport kesheni» MKQK-niń dırektory boldy.
2021 jyldan bastap Túrkistan qalasynyń VII-VIII shaqyrylym máslıhattarynyń depýtaty bolsa, 2025 jyldyń basynan búgingi kúnge deıin Túrkistan oblystyq «Olımpıada rezervin daıarlaý ortalyǵynyń» dırektory qyzmetin atqaryp keldi.
Aıta keteıik, budan buryn «Astana Opera» teatrynyń dırektory taǵaıyndalǵanyn jazǵan bolatynbyz.