Túrkistan oblysynyń turǵyny óziniń týý deregin 30 jyldan keıin dáleldedi

TÚRKІSTAN. KAZINFORM - Ordabasy aýdandyq soty erekshe isti qarady.

Aryzdanýshy 1994 jyly Bógen aýylyndaǵy aýrýhanada dúnıege kelgen. Alaıda ata-anasy sol ýaqytta tıisti qujattardy rásimdemegendikten, ol eshqashan resmı túrde týý týraly kýálik almaǵan. Osyǵan baılanysty azamat ómir boıy zańdy qujatsyz qalyp, tek mektepti bitirgeni jónindegi attestatpen shektelip kelgen.

Búginde ol otbasyly, azamattyq nekede tórt balasy bar. Sotta kýálardyń jaýaby, aýdandyq jumyspen qamtý jáne áleýmettik baǵdarlamalar bólimi ókiliniń qorytyndysy jáne «Medıkal Genomıks» JShS-niń saraptamasy onyń jeke basyn tolyqtaı dáleldedi.

Sot Qazaqstan Respýblıkasy Joǵarǵy Sotynyń 2002 jylǵy 28 maýsymdaǵy №13 «Zańdyq mańyzy bar faktilerdi anyqtaý týraly ister boıynsha sot praktıkasy týraly» normatıvtik qaýlysyna jáne Azamattyq protsestik kodekstiń tıisti baptaryna súıene otyryp, aryzdanýshynyń talabyn tolyq qanaǵattandyrdy.

Osylaısha, 2025 jyldyń 20 maýsymynda Ordabasy aýdandyq sotynyń sheshimimen azamattyń dúnıege kelgen faktisi resmı túrde anyqtaldy. Sheshim zańdy kúshine endi.

Aıta keteıik, budan buryn Shymkentte oqýshyny urǵan muǵalim qamaýǵa alynǵanyn jazǵan bolatynbyz.