Túrkistan oblysynyń turǵyndaryna gazǵa zańsyz qosqany úshin 163 mln teńge qaıtaryldy

TÚRKІSTAN. KAZINFORM — Ulttyq ekonomıka mınıstrligi Tabıǵı monopolııalardy retteý komıtetiniń Túrkistan oblysy boıynsha departamenti júrgizgen jospardan tys tekserý nátıjesinde «QazaqGaz Aimaq» AQ Túrkistan óndiristik fılıalynyń rettelip kórsetiletin qyzmetterdi usyný tártibin óreskel buzǵany anyqtaldy. 

— 2022 jylǵy 4 naýryz ben 2023 jylǵy 31 jeltoqsan aralyǵynda fılıal óńir tutynýshylarynan gazdy alǵash iske qosý kezinde qosý jáne plombalaý úshin zańsyz tólemder alǵan. Negizsiz óndirilgen jalpy soma 163 545 574 teńge, — delingen Tabıǵı monopolııalardy retteý komıteti habarlamasynda.

Ákimshilik is qaraý qorytyndysy boıynsha, fılıal Ákimshilik quqyq buzý týraly kodekstiń 164-baby 5-bóligine sáıkes kináli dep tanylyp, oǵan 16 354 557,4 teńge mólsherinde aıyppul salyndy. Sonymen qatar, departament tutynýshylardan zańsyz alynǵan somany qaıtarý jóninde mindetti uıǵarym shyǵardy.

Retteýshiniń sheshimi gaz kompanııasy tarapynan sot tártibimen daýlanǵanymen, Túrkistan oblysynyń mamandandyrylǵan aýdanaralyq ákimshilik soty talap aryzdy qanaǵattandyrýdan bas tartty, apellıatsııalyq ınstantsııa sheshimdi ózgerissiz qaldyrdy, al Joǵarǵy Sotyna joldanǵan kassatsııalyq shaǵymdy ótinish berýshiniń ózi qaıtaryp alǵan.

Qazirgi ýaqytta zańsyz óndirilgen qarajatty Túrkistan oblysy turǵyndaryna qaıtarý boıynsha praktıkalyq jumys júrgizilip jatyr. Bul protsess erekshe baqylaýda tur jáne azamattardyń quqyqtaryn qorǵaýǵa, retteletin naryqtarǵa degen senimdi arttyrýǵa ári kommýnaldyq qyzmetter kórsetý salasyndaǵy ashyqtyqty qamtamasyz etýge baǵyttalǵan. 

Aıta ketelik Qarashyǵanaq aktsıonerleri gaz óńdeý zaýytyn salýǵa Qazaqstannan qosymsha $1 mlrd talap etkeni týraly jazǵan edik.