Túrkistan oblysynyń turǵyndary ákimge óńirde qalyptasqan eń mańyzdy degen máselelerdi jetkizdi
TÚRKІSTAN. KAZINFORM - Túrkistan oblysyn damytýda turǵyndardyń ótinishteri men usynystary esepke alynyp, kóterilgen máseleler kezeń-kezeńimen sheshimin taýyp keledi, dep habarlaıdy oblys ákiminiń baspasóz qyzmeti.
Baspasóz qyzmetiniń habarlaýynsha, búgin oblys ákimi Nuralhan Kósherov turǵyndardy jeke qabyldap, olardyń aryzdary men ótinishterin tyńdady. Azamattar ákimge tikeleı suraqtaryn qoıyp, usynystaryn jetkizip jatyr. Erkin formatta ótken qabyldaýda azamattar, negizinen, jeke máselelerin kóterdi. Sondaı-aq qabyldaýǵa oblys ákiminiń orynbasarlary, basqarma basshylary, aýdan-qala ákimdikteriniń, quqyq qorǵaý jáne memlekettik organdardyń ókilderi qatysyp, azamattardyń suraqtaryna jaýap berdi.
Ashyq dıalog alańynda 100-ge jýyq turǵyn túrli salalar boıynsha máselelerin jetkizdi. Kóterilgen ótinishterdiń basym bóligi turǵyn úı, áleýmettik kómek, densaýlyq saqtaý, jumysqa ornalasý, jer jáne ınfraqurylymǵa qatysty.
Oblys ákimi árbir ótinishke muqııat nazar aýdaryp, olardyń sheshý joldaryn qarastyrdy. Oblys ákiminiń jaýapty orynbasarlary men basqarma basshylaryna jiti zerdelep, zań aıasynda sheshim qabyldaý boıynsha naqty tapsyrmalar berdi. Turǵyndar kótergen máselelerdiń bir bóligi sol jerde oń sheshimin tapsa, qalǵany baqylaýǵa alyndy. Sonymen birge qabyldaýǵa jazylǵan turǵyndarǵa demeýshiler esebinen merekelik syılyq tapsyryldy.
-Tańerteńnen bastalǵan jeke qabyldaý áli de jalǵasyp jatyr,-delingen Túrkistan oblysy ákiminiń baspasóz qyzmeti taratqan habarlamada.
