Túrkistan oblysynyń Tólebı aýdanynda iri sút fermasy iske qosylyp, 100 adam jumyspen qamtylady
TÚRKІSTAN. KAZINFORM – Tólebı aýdanynyń Zertas aýyldyq okrýginde «AZIA MILK» markasymen iri sút fermasy iske qosylady dep kútilýde. 2024-2027 jyldar aralyǵynda júzege asyrylatyn ınvestıtsııalyq jobanyń jalpy quny 1,3 mlrd teńgeni quraıdy.
Eldi meken shetindegi 10 gektar aýmaqqa ızraıldik tehnologııa negizinde ferma ashýdy kózdegen kásipker 1 200 bas iri qaraǵa arnalǵan qora, jem-shóp jınaıtyn oryn, sútti jınaıtyn, ári sút ónimderin daıyndaıtyn arnaıy ǵımarat salmaq. Joba tolyǵymen júzege asqan jaǵdaıda júzdegen jergilikti turǵyn jumyspen qamtylady dep kútilýde.
Tólebı aýdany ekonomıkasynyń ilgerileýine aıtarlyqtaı oń áserin tıgizetin fermaǵa aýdan ákimi Tólegen Telǵaraev arnaıy baryp, jobamen keń kólemde tanysty. Kásipker fermaǵa meteostantsııasy bar jeldetkish jáne zamanaýı jaryq júıesi, sıyrdyń toıǵany men jaǵdaıyn anyqtaıtyn beıne-kameralar ornatylatynyn jetkizdi. Aýdan basshysy óndiris orny – óńirdegi sút sharýashylyǵyn damytyp, aýdan turǵyndaryn jumyspen qamtıtynyn aıtty. Sonymen qatar jeke kásipkerdiń 240 bas iri qara mal bordaqylaý alańynyń jumysymen tanysyp, memlekettik baǵdarlamalardy tıimdi paıdalaný týraly keńes berdi.
Keıin aýdan ákimi Kıelitas aýyldyq okrýgindegi jeke kásipker Sáken Sársenovtiń balyq sharýashylyǵymen tanysty. Kásipker óz qarajaty esebinen 0,5 gektar aýmaqqa 10 tonnadan astam sazan balyǵyn ósirip otyr. Sondaı-aq 1,6 gektar jerge demalys aımaǵynyń qurylysy júrgizgen. Munda da jergilikti turǵyndar jumyspen qamtylyp otyr.
