Túrkistan oblysynyń Sozaq aýdanyna Shý ózeni arqyly 1,5 mlrd tekshe metrden astam sý jiberildi

ASTANA. KAZINFORM —  Sý Jambyl oblysyndaǵy Tasótkel sý qoımasynan jiberildi. Bul jumys tabıǵatty qorǵaý maqsatyndaǵy sý jiberý sharalary aıasynda byltyr qyrkúıekten bastalyp, bıyl sáýirdiń sońyna deıin júrgizildi. Bul týraly Sý resýrstary jáne ırrıgatsııa mınıstrligi málim etti.

Sý Sozaq aýdanyna aqpan aıynda jetti. Qajetti kólemdi qamtamasyz etý úshin Sý resýrstary jáne ırrıgatsııa mınıstrligi Qyrǵyz Respýblıkasyndaǵy áriptesterimen birneshe kelissóz júrgizdi.

Sý resýrstary jáne ırrıgatsııasy mınıstri Nurjan Nurjigitovtiń tapsyrmasy boıynsha «Qazsýshardyń» Jambyl fılıaly men Shý-Talas basseındik ınspektsııasynyń mamandary Shý ózeni ańǵarynda monıtorıng júrgizip, tabıǵatty qorǵaý maqsatyndaǵy sý jiberý jumystarynyń nátıjesimen tanysty. Jumys toby Sozaq aýdanymen qatar, Jambyl oblysynyń Shý, Moıynqum jáne Sarysý aýdandaryna da bardy.

Mundaı kólemdegi sý Sozaq aýdanyna sońǵy bes jylda alǵash ret jetip otyr, sol sebepti jergilikti turǵyndar mınıstrlikke alǵys bildirip jatyr.

— Aýdan halqy atynan sýdyń jetkizilip jatqanyna qýanyshty ekenimizdi aıtqym keledi. Aptap ystyqqa qaramastan, sýdy jetkizý baǵytyndaǵy jumysty jalǵastyryp, ózderińiz jergilikti jerlerge shyǵyp, jaǵdaıdy baqylap otyrǵandaryńyzǵa alǵys aıtamyz, — dedi Sozaq aýdanynyń turǵyny Rıshat Tańatov.

Bıyl sondaı-aq Sý resýrstary jáne ırrıgatsııa mınıstri Nurjan Nurjigitovtiń tapsyrmasymen Shý ózeninen sý Sozaq aýdanyna jiberiletin Fýrmanov aınalma kanalyn tazartý josparlanyp otyr.