Túrkistan oblysynyń sharýalary sýsyz qaýyn ósirip, mol ónim jınady
Túrkistan oblysynyń sharýalary sýsyz qaýyn ósirip, mol ónim jınady, dep habarlaıdy Kazinform.
Túrkistan oblysynyń sharýalary qaýyn ósirýde tyń tásildi paıdalana bastady. ıAǵnı, egistikti sýarmaı-aq, mol ónim jınaýǵa bolatynyn kórsetti. Ońtústiktegi 45-50 gradýs ystyqta bir tamshy sý ishpegen qaýyndar dámdi ári úlken bolyp ósken. Sharýalardyń sózinshe, aýyl sharýashylyǵyndaǵy bul tásildi ata-babalarymyz buryn da qoldanǵan.
«Jyldan-jylǵa sýarmaly sý máselesi kóbeıip keledi. Sondyqtan burynǵy ata-babalarymyzdyń úıretken tájirıbesin jasap kórýge bel býdym. Sodan egistikti sýarmaı-aq qaýyn ósirip, jaqsy ónim jınadym» - deıdi sharýa Azızhan Egemberdıev.
Azızhan Rahymbaıuly Qarnaq aýylynda turady. Onyń aýyl mańyndaǵy «Dódegen» jer ýchaskesinde egistikke arnalǵan jeri bar. Bıyl sonyń 4 gektaryna qaýyn, 1 gektaryna qarbyz ekken. Nápaqasyn jer anadan izdegen sharýa jınaǵan ónimin jergilikti jerde saýdaǵa shyǵarǵan. Dámdi qaýyndy tutynýshylar da kóp bolypty.
«Kóktemniń alǵashqy aılarynda sýarmaly sý eshkimge kerek emes kezder bolady. Sol aqpan aıynyń basynda egistik alqabymdy ábden sýaryp, sý sińdirip aldym. Sodan qaýyn ektim. Shilde aıyndaǵy 45-50 gradýs ystyqta da sý bergen jokpyn. 120 kún sý ishpedi. Nátıjesinde qaýyndarym jaqsy ónim berdi. Dámdi boldy» - deıdi sharýa.
Azızhan Egemberdıevtiń aıtýynsha, bul tásildi kez kelgen qaýynnyń sortyna paıdalana berýge bolady. Tek jer tyń bolýy qajet. Endi sharýa aldaǵy jyldary egistik alqabyn ulǵaıtýdy josparlap otyr. Qaýynnan mol ónim alyp jatsa, shet elge alyp baryp satý da oıynda bar.
