Túrkistan oblysynyń sharýalary qysta kartop pen qyryqqabat egip jatyr
TÚRKІSTAN. KAZINFORM- Jetisaıda qyryqqabat, Keleste kartop egý jumystary bastaldy.
Qazaqstannyń keıbir aımaqtarynda kún sýyp, aıaz bolyp jatsa, Ońtústik óńirde egin egý bastalyp ketti.
Jetisaı aýdanynyń dıqandary qyryqqabat egip jatyr. Egistigine erte kóshet otyrǵyzýdy bastaǵandardyń biri – Rýslan Qudaıqulov.
Sharýa bıylǵy jyly 15 gektarǵa oramjapyraqtyń erte pisetin «Zarısma» jáne «Valıkor» sorttarynyń 525 myń túp kóshetin egýdi bastady. Ótken jyly da dál osy eki sorttan joǵary ónim alǵan. 10 jyldan beri aǵyn sýdy únemdeý maqsatynda tamshylatyp sýǵarý ádisin qoldanyp keledi.
– Es bilgeli otbasymyzben dıqanshylyqpen aınalysamyz. Negizgi kún kórisimiz de osy. Munda qazir 20 adam jumys istep jatyr, jumysshylarǵa kúnine 5000 teńgeden eńbekaqysyn tólep otyrmyz. Naýryz aıynda ortasyndaǵy ashyq jerge qarbyz, bolgar buryshyn egip, oıdaǵydaı ónim alamyz dep nıettenip otyrmyz. Egilgen kóshettiń ústin japqyshpen jaýyp, jaýyn-shashynnan qorǵaımyz. Eń bastysy – kútip-baptaýǵa úlken mán berilýi kerek, – deıdi sharýashylyq tóraǵasy Rýslan Qudaıqulov.
Al Keles aýdanyna qarasty Aqqorǵan aýylyndaǵy sharýalar kartop egip jatyr. Mundaǵy dıqandar bir maýsymda eki ret ónim jınaıdy. Qazir kúndelikti egistik alqabynda eńbek etip jatyr.
– Bıyl 3 gektar jerge kartap, 3 gektar jerge sábiz ektik. Alda, taǵy eki gektarǵa qyryqqabat egemiz. Reseıden kartoptyń «rıver» atty erte pisetin sortyn aldyrdyq. ıAǵnı, 60-65 kún ishinde jeýge jaramdy bolady. Al «artemıst» sorty 70-80 kúnde ónim beredi. Sýyqtan, jaýyn-shashynnan qorǵaý úshin egistik betin arnaıy materıalmen jaýyp qoıamyz, - deıdi «Tynybek» sharýa qojalyǵynyń tóraǵasy Nurlybaı Ahmetov.
Aıta keteıik, budan buryn Túrkistanda aǵashtar búrshik ata bastaǵanyn jazǵan bolatynbyz.