Túrkistan oblysynyń sharýalary qaqaǵan qysta lımon jınap jatyr
Túrkistan oblysyndaǵy jylyjaılarda lımon pisti, dep habarlaıdy Kazinform.
Túrkistan oblysynda lımon ósirý keń etek ala bastady. Arnaıy jylyjaıda ósirilip jatqan tropıkalyq jemis qys ortasynda pisip, mol ónim berip jatyr.
Máselen, Saryaǵashtaǵy «Daıan» sharýa qojalyǵynyń ıesi Ospanáli Tańsyqbaevtyń lımon ósirýdi qolǵa alǵanyna bıyl 10 jylǵa jýyq ýaqyt boldy. 60 sottyq jerge 640 lımon aǵashyn otyrǵyzǵan sharýa kúni-túni kútim jasap, baptady. Tamyr jaıýyn táýlik boıy baqylady. Eren eńbektiń nátıjesinde tropıkalyq beldeýde ǵana ósetin jemis aǵashy Saryaǵash topyraǵyna jersindi. Búgingi kúni sharýa lımon alqabynan mol ónim alyp otyr.
«Qazir dalada kún sýyq. Al jylyjaı ishine kirseńiz jyp- jyly. Lımon ósip tur. Iisiniń ózi keremet» - deıdi Ospanáli Tańsyqbaev.
Jalpy Tańsyqbaevtardyń otbasylyq kásibi kól-kósir paıdaǵa keneltip otyr. Sharýashylyqtyń jumysymen aǵaıyndy ekeýi aınalysady. Al terim naýqanynda onǵa jýyq turǵyndy jumysqa alady. Satý isimen de sharýanyń ózi shuǵyldanady. Máskeý, Almaty, Astanaǵa deıin baryp, satyp kelgen kezderi bar. Odan bólek, KamAzben kelip artyp ketetin alypsatarlar da kóp. Al ordabasylyq sharýa Baqytjan Otanbaev 5 gektar jerden 40 tonnadan astam ónim jınady. Qazir lımondardy alys-jaqyn qalalarǵa saýdaǵa shyǵaryp jatyr.
«Elnur-Aıdar» sharýa qojalyǵyna qarasty 5 gektar jer teliminiń 4 gektaryna alma, 0,5 gektaryna lımon, al qalǵan alqapqa qulpynaı ektik. Jylyjaıǵa 707 dana lımon, 6 myń túp qyzyl almanyń kóshetin otyrǵyzdyq. Qazir 6 adamdy turaqty jumyspen qamtyp otyrmyz», - deıdi sharýa.
