Túrkistan oblysynyń Saıram aýdanyna jańa ákim saılandy

TÚRKІSTAN. KAZINFORM — 2025 jylǵy 5 qazanda ótken Túrkistan oblysy Saıram aýdany ákimi saılaýynyń nátıjesi jarııalandy.

Jalpy aýdanda saılaýshylar tizimine 138 762 azamat engizilgen. Daýys berýge — 79 233 saılaýshy, onyń ishinde esepten shyǵarý kýálikteri boıynsha — 0, daýys berýge arnalǵan úı-jaılardan tys — 415 saılaýshy qatysty. Jalpy saıası dodaǵa 3 kandıdat túsken bolatyn.

Saıram aýdandyq aýmaqtyq saılaý komıssııasynyń málimetinshe, Dýlat Talǵatuly Abylgazıev úshin 4 724 saılaýshy daýys bergen. Ekinshi kandıdat Madııar Muhtaruly Orazalıevqa 66 837 adam senim bildirgen. Al, Almas Meırbekuly Turarov 7 132 saılaýshy daýys jınaǵan. «Bárine qarsymyn» belgisi bar bıýlletender sany — 255.

— Saılaý qorytyndysymen 1986 jyly týǵan, ulty — qazaq, Túrkistan oblysy Saıram aýdany, Mankent aýyldyq okrýginiń turǵyny Madııar Muhtaruly Orazalıev saılandy. «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańynyń 14, 45, 113-11 baptaryna sáıkes Saıram aýdanynyń aýmaqtyq saılaý komıssııasynyń 2025 jylǵy 7 qazandaǵy sheshimimen 2025 jylǵy 5 qazanda saılanǵan Madııar Muhtaruly Orazalıev Túrkistan oblysy Saıram aýdanynyń ákimi bolyp tirkeldi, — delingen Saıram aýdandyq aýmaqtyq saılaý komıssııasynyń resmı habarlamasynda.

Madııar Orazalıev buǵan deıin Qazyǵurt aýdany ákiminiń orynbasary bolyp qyzmet atqarǵan.

Budan buryn Májilis saılaý týraly Konstıtýtsııalyq zańǵa ózgerister engizetini habarlandy.