Túrkistan oblysynyń polıtseıleri kisi óltirgen kúdiktini izdep jatyr

TÚRKІSTAN. KAZINFORM — Tólebı aýdanynda er adamdy óltirý faktisi boıynsha qylmystyq is qozǵaldy. Bul týraly Túrkistan oblysy polıtsııa departamentiniń resmı ókili Gúlnar Abdýjapparova málimdedi.

Oqıǵa Túrkistan oblysy Birkólik aýylyndaǵy demalys aımaǵynda boldy. 51 jastaǵy er adamnyń denesinen pyshaq jaraqattary tabylǵan.

«Kúdiktiniń jeke basy anyqtaldy jáne ony ustaý sharalary qabyldandy. Departament basshylyǵynyń tapsyrmasy boıynsha arnaıy jedel-tergeý toby quryldy. Kúdiktini izdestirýge polıtsııa departamentiniń jeke quramy jumyldyryldy. Qazirgi ýaqytta bolǵan oqıǵanyń barlyq mán-jaılaryn anyqtaýǵa baǵyttalǵan qajetti jedel-izdestirý jáne tergeý is-sharalary júrgizilýde», — dedi Gúlnar Abdýjapparova.

Aıta keteıik, budan buryn Pavlodarda eki stýdent qyz tórtinshi qabattan qulap ketkenin jazǵan bolatynbyz.