Túrkistan oblysynyń qýańshylyq jaılaǵan aýdandarynda tótenshe rejım engizile me
ASTANA. KAZINFORM — Túrkistan oblysynda egistik alqabynyń 49,8 myń gektary jaramsyz dep tanyldy. Bul týraly Májilis depýttarynyń saýalyna Premer-mınıstr Oljas Bektenovtiń jaýabynda aıtylǵan.
— Túrkistan oblysyndaǵy jalpy egis alqaby bıyl 896,2 myń gektar. Onyń 389,3 myń gektary — atmosferalyq jaýyn-shashynǵa táýeldi jerler. Aýa raıy qolaısyz bolyp, egistiktiń bir bóligi paıdalanýǵa jaramsyz dep tanyldy (shamamen 49,8 myń gektar). Bul jalpy egis alqabynyń 5,5 paıyzy. Keleńsiz saldardy azaıtý, zalaldy baǵalaý jáne qabyldanyp jatqan sharalardy úılestirý maqsatynda oblys aýdandarynda jergilikti atqarýshy organdar, jurtshylyq pen kredıttik uıymdar ókilderiniń qatysýymen mobıldi jumys toptary quryldy. Egistiktiń jaı-kúıine kóshpeli monıtorıng jáne zaqymdaný aýqymy týraly aqparat jınaý turaqty negizde júrgizilip turady, — dedi Úkimet basshysy jaýabynda.
Premer-mınıstr «Qazgıdromet» RMK derekterine jáne bıylǵy maýsymda jaýyn-shashynnyń standarttalǵan ındeksteriniń esep-qısabyna sáıkes, elimizdiń kóptegen óńirinde atmosferalyq ylǵal shegi normaǵa sáıkes dep boljanatyndyǵyn atap ótedi.
— Osyǵan baılanysty qazirgi kezeńde tótenshe jaǵdaı rejımin engizýge negiz joq. Budan basqa, ákimdikter qajet bolǵan jaǵdaıda ınnovatsııalyq qyzmetti, onyń ishinde agroónerkásiptik keshendegi qyzmetti damytýǵa baǵyttalǵan óńirlik baǵdarlamalardy ázirleıdi jáne iske asyrady. Yqtımal qurǵaqshylyqtyń saldaryn azaıtý jónindegi sharalardy qosa alǵanda, uıymdastyrýshylyq, quqyqtyq jáne ózge de qoldaýdy qamtamasyz etedi. Aýyl sharýashylyǵynyń sý resýrstaryna táýeldiligin tómendetý maqsatynda ýákiletti organ egis alqaptarynyń qurylymyn ártaraptandyrý saıasatyn iske asyrýdy jalǵastyryp jatyr. Bul bıdaı, kúrish jáne maqta sııaqty monodaqyldardyń úlesin azaıtýdy jáne óńirlik erekshelik pen ishki suranysty eskere otyryp, joǵary rentabeldi balamaly daqyldardy (maıly daqyldar, kókónis-baqsha, jemshóp jáne t. b.) bir mezgilde damytýdy kózdeıdi, — dedi Oljas Bektenov.
Aıta keteıik, Májilis depýtattary qýańshylyqtan zardap shekken aýdandarda tótenshe jaǵdaı rejımin jarııalaý múmkindigin qarastyrýdy jáne qýańshylyq zardaptaryn eńserýge baǵyttalǵan arnaıy óńirlik baǵdarlama qabyldap, onyń aıasynda ǵylymı negizdelgen agroekologııalyq sheshimderdi júzege asyrýdy usynǵan bolatyn.
Buǵan deıin Túrkistan oblysynda uzaqqa sozylǵan qýańshylyq saldarynan egistik alqaptary kúıip, sharýalar shyǵynǵa batyp jatqanyn jazǵan edik.