Túrkistan oblysynyń Keles aýdanynda qulaǵan kópir qashan qalpyna keltiriledi
TÚRKІSTAN. KAZINFORM — Keles aýdanyndaǵy oblystyq mańyzy bar avtojolda ornalasqan kópirdiń qulaǵanyna bir jylǵa jýyqtady. Turǵyndar kópirdiń qashan qalpyna keltiriletinine alańdaýly. Jaýapty basqarma qurylys jumystarynyń bastalýyna qatysty túsinik berdi.
2025 jyly jeltoqsanda Túrkistan oblysynyń Keles aýdanyna qarasty Qoshqarata aýyldyq okrýgi aýmaǵynda Keles ózeni arqyly ótetin oblystyq mańyzy bar KH-20 avtomobıl jolyndaǵy kópir qulaǵan bolatyn. Sol kezde ákimdik ony qalpyna keltirý boıynsha shuǵyl sharalar qabyldanatynyn málimdegen edi.
Alaıda turǵyndar kópirdiń áli jóndelmegenin aıtyp, sonyń saldarynan birqatar qıyndyq týyndaǵanyn jetkizdi. Áleýmettik jelilerde olar máseleni kóterip, jaǵdaıǵa alańdaýshylyq bildirgen.
@aibek_bloger Kópir qashan salynady?. #kazakhstan🇰🇿 #al #rekk #rekmendatsıı #kelesabaı ♬ Ashes on the Bow - Whispering Pigeon Echo
@xalyk_balasy Kópirdiń jyry. Qashan kópir salynbaq?. #kópir #most #rekomendatsıı #rek ♬ Steel Commands - Soda Poppy
Jergilikti turǵyndardyń aıtýynsha, kópir qulaǵannan keıin halyq ortalyqqa tikeleı qatynaı almaı, aınalma jolmen júrýge májbúr bolǵan. Osylaısha, buryn 13 shaqyrym bolǵan joldyń uzyndyǵy 35 shaqyrymǵa deıin uzarǵan.
— Ol jolmen qatynaý qıynǵa soqqandyqtan, turǵyndar burynǵy baǵyttaǵy shamamen 5 shaqyrymdyq qyr jolyn paıdalanýǵa kóshti. Jol laı bolǵandyqtan, turǵyndar ózderi qarjy jınap, demeýshilerdiń kómegimen shaǵal tósedi. Kóktemde kórshi Júzimdik aýyldyq okrýginen temir kópir ákelinip, ornatyldy. Alaıda kópirdiń eki jaǵy da talapqa saı emes. Ásirese aldaǵy qys mezgilinde joldyń laılanýy kólikterdiń qozǵalysyna qaýip tóndirýi múmkin. Budan bólek, taksı júrgizýshileri de jolaqysyn kótergen, — dedi aýdan turǵyny Aıbek Smaılov.
Turǵyndardyń aıtýynsha, kópirdiń qulaýy balalardyń mektepke qatynaýyna da áser etken. Qoshqarata aýyldyq okrýgindegi Ushqyn aýylynan 40-tan astam oqýshy mektepke qatynaıdy. Qazir olardy mektepke jetkizý úshin kólik aınalma jolmen júredi.
Máselege qatysty Túrkistan oblysynyń jolaýshylar kóligi jáne avtomobıl joldary basqarmasy jaýap berdi.
Resmı málimetke sáıkes, basqarmanyń tapsyrysymen jobalaýshy «Dáýlet» JShS Keles aýdanyndaǵy oblystyq mańyzy bar KH-20 «Abaı — Ushqyn — Dostyq» avtomobıl jolynyń 4+300 shaqyrymyndaǵy kópirdi kúrdeli jóndeý boıynsha jobalyq-smetalyq qujattama ázirlegen. Jobanyń quny — 806,7 mln teńge. 2026 jylǵy 5 tamyzda «Central Expertise» JShS-niń oń qorytyndysy alynǵan.
— Qazirgi ýaqytta oblystyq bıýdjetten 100 mln teńge qarjy qaralyp, merdiger mekeme retinde «JBI-S» JShS anyqtaldy. Kelisimshart jasaý jumystary júrgizilip jatyr. Qurylys jumystaryn 2026 jylǵy 1 qazanda bastaý josparlanǵan, — delingen basqarma jaýabynda.
Buǵan deıin Túrkistan oblysynyń Keles aýdanynda respýblıkalyq mańyzy bar avtomobıl jolynyń jóndelgen ýchaskesi eki aıǵa jetpeı oıyla bastaǵany týraly habarlaǵan edik.
