Túrkistan oblysynyń Keles aýdanynda bilim bóliminiń bıýdjetin talan-tarajǵa salǵandarǵa qatysty sot úkimi shyqty
TÚRKІSTAN. KAZINFORM — Qylmystyq árekettiń nátıjesinde memleketke 812 mln teńgeden astam materıaldyq zalal kelgen.
Túrkistan oblysy Keles aýdandyq sotynda QR QK-niń 189-baby 4- bóliginiń 2 tarmaǵymen kináli dep tanylǵan, bilim bóliminiń qyzmetkerlerine qatysty úkim jarııalandy.
Sottalýshylarǵa bilim bóliminde basshy, bas esepshi jáne esepshi laýazymdarynda qyzmet atqaryp júrip, ózderine senip tapsyrylǵan bıýdjet qarajatyn ıemdenip, qasaqana jymqyrǵan degen aıyp taǵyldy. ıAǵnı, kináliler bilim bóliminde jáne bólimge qarasty mektepterde jumys jasamaǵan adamdardyń aty-jóniniń tusyna basqa adamdardyń JSN nómirlerin kórsetý arqyly, bólimniń bıýdjet qarajatyn úshinshi tulǵalardyń bank esep shottaryna aýdaryp otyrǵan.
Sottalýshylardyń qylmystyq áreketiniń nátıjesinde memleketke jalpy 812 380 693 teńge materıaldyq zalal keltirilgen.
Sot úkimimen segiz sottalýshy, ony ishinde bilim bóliminiń basshysy, bas esepshileri men esepshileri QK-niń 189-baby 4-bóliginiń 2 tarmaǵymen kináli dep tanylyp, memlekettik qyzmette, sýdıa qyzmetin, jergilikti ózin-ózi basqarý organdarynda, Qazaqstan Respýblıkasynyń Ulttyq Bankinde jáne onyń vedomstvolarynda, qarjy naryǵy men qarjy uıymdaryn retteý, baqylaý jáne qadaǵalaý jónindegi ýákiletti organda, memlekettik uıymdarda jáne kvazımemlekettik sektor sýbektilerinde ómir boıyna laýazymdy qyzmeti atqara almaıtyn boldy. Sondaı-aq, 7 jyl merzimge bas bostandyǵynan aıyrý jazasy taǵaıyndaldy.
Bes sottalýshy QK-niń 63-babynyń talaptaryna sáıkes, taǵaıyndalǵan bas bostandyǵynan aıyrý jazasy shartty dep eseptelip, 279 426 890 teńge materıaldyq zalal qaıtaryldy.
Taǵy on sottalýshy QK-niń 189-baby 3-bóliginiń 1 tarmaǵymen kináli dep tanylyp, belgili bir laýazymdardy atqarý quqyǵynan úsh jyl merzimge aıryla otyryp, 3 jyl merzimge bas bostandyǵyn shekteý jazasy taǵaıyndaldy.
— Sottalýshylardyń kinálary aýdıtordyń, sot-ekonomıkalyq saraptama qorytyndylarymen, kýálerdiń jaýaptarymen, sottalýshylardyń sotta bergen jaýaptarymen jáne istiń basqa da qujattarymen dáleldendi. Úkim zańdy kúshine engen joq, — delingen Túrkistan oblystyq sotynyń baspasóz qyzmeti usynǵan aqparatta.
Aıta keteıik, budan buryn Túrkistan oblysynda bilim salasynyń qyzmetkerleri 547 mıllıon teńgeden astam qarjy jymqyrdy degen aıyppen sottalǵan bolatyn.