Túrkistan oblysynyń qaı aımaǵynda ekologııalyq jaǵdaı nashar
TÚRKІSTAN. KAZINFORM — Atmosferalyq aýanyń lastanýy boıynsha jergilikti atqarýshy organdardyń laýazymdy tulǵalaryna 7,1 mln teńge kóleminde aıyppul salyndy.
Túrkistan oblysy boıynsha ekologııa departamentiniń málimetine súıensek, óńirdegi Sozaq aýdanynda ýran óndirý kásiporyndarynyń, Saryaǵash aýdanynda jylyjaılardyń jáne Ordabasy aýdanynda qysh óndirý zaýyttarynyń kóp ornalasýyna baılanysty ekologııalyq jaǵdaı jıi nasharlaıdy.
Departament tarapynan Qazaqstan Respýblıkasy Ekologııa Kodeksi talaptarynyń saqtalýyna jyl basynan beri 6 ret tekserý júrgizilgen. Nátıjesinde 21 ekologııalyq zań buzýshylyqtar anyqtalyp otyr. Onda 8 nusqama berilip, jeke jáne zańdy tulǵalarǵa 84,3 mln teńge kóleminde ákimshilik aıyppul salynǵan.
Sonymen qatar, oblys aýmaǵynda beı-bereket qoqys oryndarynyń belgilenbegen oryndarda zańsyz jınaqtalýy jáne qatty turmystyq qaldyqtar polıgondarynyń órtenýi saldarynan atmosferalyq aýanyń lastanýy boıynsha jergilikti atqarýshy organdardyń laýazymdy jáne zańdy tulǵalaryna 7,1 mln teńge kóleminde aıyppul salynǵan. Olardyń ishinde Ordabasy, Saýran, Jetisaı, Qazyǵurt, Keles aýdany men Saryaǵash. Túrkistan qalasy ákimi apparatynyń laýazymdy tulǵalary jáne aýyldyq okrýg ákimi apparatynyń qyzmetkerleri bar.
— Oblys aýmaǵynda ekologııalyq máselelerdi jaqsartý maqsatynda, 2020-2024 jylǵa 23 is-sharany quraıtyn jol kartasy bekitilgen bolatyn. Qazirgi tańda, 14 is-shara oryndaldy. Olar qala aýmaqtaryn gazdandyrý jumystaryn júrgizý, qoqys úıindilerin joıý, jasyl jelekter alańdaryn ulǵaıtý jáne taǵy basqa da is-sharalar turaqty túrde oryndalý satysynda. Qazirgi tańda, 2024-2026 jyldarǵa arnalǵan ekologııalyq máselelerdi keshendi sheshýdiń jol kartasy jańartyldy, — delingen departament aqparatynda.
Aıta keteıik, budan buryn qaldyqty qaıta óńdeý jobalary nege baıaý atqarylatyndyǵyn jazǵan bolatynbyz.