Túrkistan halqy kúnde tasattyq berip jatyr – depýtat óńirdegi qýańshylyq máselesin kóterdi

ASTANA. KAZINFORM – Májiliste ótip jatqan Úkimet saǵatynda depýtat Ulasbek Sádibekov Túrkistan oblysynyń birneshe aýdany qýańshylyqtan zardap shegip jatqanyn málim etti.

- Bıyl eldiń biraz óńirin qýańshylyq jaılap, turǵyndardyń tynys-tirshiligine edáýir qıyndyq ákelip otyr. Ásirese Túrkistan oblysynyń Báıdibek, Sozaq aýdandaryna qýańshylyq saldary óte aýyr tıip jatyr. Shóp shyqpaı, jaıylymdardyń qýrap ketýi sý kózderiniń tartylýy kúndelikti turmysqa tikeleı áser etip otyr. Malǵa azyq tabý muńǵa aınalǵan halyq kúnde tasattyq berip, táńirge jalbarynyp otyr. Keshe ǵana Báıdibek aýdanyndaǵy eginniń basynda boldym. Endi jańbyrdan kúderin úzip, ekken eginimiz kombaın oraǵyna ilinse eken dep qudaıdan tilep otyr. Sý únemdeý joldary nege halyq arasynda keńinen qoldanylmaı jatyr, - dep surady depýtat.

Sý resýrstary jáne ırrıgatsııa mınıstri Nurjan Nurjigitov byltyr sý únemdeý júıesin engizgen sharýalarǵa tólenetin sýbsıdııa kólemin kótergenderin aıtty.

- Sýbsıdııa tólenetin shyǵyn kólemin 50 paıyzdan 80 paıyzǵa kóterdik. Onyń 30 paıyzy jergilikti ákimdik bıýdjetinen beriledi. Sý únemdeý tehnologııalaryn engizgen sharýa qojalyqtaryna beriletin sýbsıdııa 2027 jylǵa deıin shyǵyndardyń 85 paıyzyna deıin ósedi. Al sý únemdeý tehnologııasyn engizbegenderge beriletin aǵyn sý alý sýbsıdııasy 30 paıyzǵa deıin túsedi, - dedi mınıstr.

Vedomstvo basshysy memleket ereje men zańdar negizinde sý únemdeıtin tehnologııalardy engizýge barlyq múmkindikterdi jasap otyrǵanyn aıtty.

- Sý únemdeý quraldaryn shyǵaratyn eki zaýytymyz bar. 2024 jyly iske qosylǵan. Tolyq qýatyn endi shyǵaıyn dep otyr. Byltyr jańbyrlatyp sýarý júıesi 70 myń gektarǵa ornatylsa, sonyń 7 myń gektaryn otandyq zaýyttar shyǵardy. Bıyl osy zaýyttarǵa 30 myń gektar jerge qajetti tapsyrys tústi, - dedi Nurjan Nurjigitov.

Aıta ketý kerek, Kaspıı máselesin sheshý aıasynda Qazaqstan Reseıge Edil sýyn birlesip retteý týraly usynys jasamaqshy.