Túrkistan oblysynyń eń qart turǵyny Ýngaı Begbaeva – 110 jasta
TÚRKІSTAN. KAZINFORM – Óńirde qarııalarǵa qurmet áli de jalǵasyp jatyr. Búgin aýdan, qala ákimderi jasy 100-den asqan aq jaýlyqty analar men qarııalardy arnaıy quttyqtap, syılyq tabys etti.
Jetisaı aýdanynyń ákimi Serik Mamytov Qazybek bı aýyldyq okrýgi, Jambyl eldi mekeniniń turǵyny 1922 jyly dúnıege kelgen Qaldan Qadyrbekovanyń shańyraǵynda boldy. 102 jasqa tolǵan Qaldan apa 1939 jyly Kırov aýdanyna otbasymen kanal qazýǵa kóship kelip, osynda turaqtap qalǵan. Ózinen týǵan 8 perzentten 40 nemere, 60-qa tarta shóbere men shópshek súıip otyr.
Jetisaı qalasynyń turǵyny Gúlsim Aqshaeva da bıyl 102 jasqa toldy. Ǵasyr kýágeri 13 perzentinen 40-tan astam nemere-shóbere súıgen. Beli qatyp, buǵanasy bekimeı jatyp tyń ıgerýge qatysyp, keıinnen Ekinshi dúnıejúzilik soǵysta qan maıdandaǵy jaýyngerlerge qolynan kelgenshe kómek bergen. Soǵystan keıingi jyldary turalap qalǵan aýyldardy qalpyna keltirý isine atsalysqan. Qolyna ketpen alyp shabyq shaýyp, masaq tergen. Dıirmende un ótkizip, mal da baqqan. Adal eńbeginiń arqasynda eldiń qurmetine bólenip otyr.
Sondaı-aq Serik Mamytov Túrkistan oblysynyń eń qart turǵyny, 110 jastaǵy Ýngaı Begbaevanyń shańyraǵynda boldy. 1914 jyly Tájikstan Respýblıkasynyń Qorǵantóbe oblysynda dúnıege kelgen ájeı búginde Qaraqaı aýyldyq okrýgine qarasty Q.Sátpaev eldi mekeninde turady. 1926 jyldan bastap eńbekke erte aralasqan aq jaýlyqty ana aýyl sharýashylyǵy salasynda maqta terip, qolmen kanal qazǵan. Kolhoz-sovhozdarda tabandy eńbek etip, jetken jetistikterimen ózgelerge úlgi bolǵan. 5 perzentinen 14 nemere men 30 shóbere súıip otyr. Qazirgi kezde tek áýlettiń ǵana emes búkil bir aýyldyń jazylmaǵan tarıhy, aqylgóı anasy ispetti.
Shańyraqtaryna arnaıy baryp quttyqtaǵan aýdan ákimine ardaqty analar alǵystaryn aıtyp, bata berdi. Búginde Jetisaı aýdanynda 17 624 zeınetker turady. Onyń bireýi – Ekinshi dúnıejúzilik soǵys ardageri, 287-si – tyl ardageri, 8-i – múgedektigi bar ardagerdiń jesirleri. Sondaı-aq 100 jastan asqan 8 qarııa, 262 eńbekke jaramsyz jalǵyzbasty qart pen múgedektigi bar azamat bar.
Qarııalarǵa qurmet Túlkibas aýdanynda da jalǵasty. Aýdan ákimi Nurjan Іztileýov jáne orynbasary Erbol Ormanov júz jasaǵan qarııalardyń úılerin arnaıy aralap, merekemen quttyqtady. Birinshi kezekte aýdan basshysy Maıtóbe aýylynda turatyn abaıtanýshy, fılologııa ǵylymdarynyń doktory, professor Mekemtas Myrzahmetulynyń shańyraǵynda bolyp, ǵasyrǵa jýyq jasaǵan qartqa syı-qurmet kórsetti. Osyndaı ıgi iske máz-meıram bolǵan qarııa shynaıy rızashylyǵyn bildirip, Nurjan Jaqsylyqulyna óziniń «Abaıtaný» atty on tomdyq jınaǵyn tartý etti. Eldiń amandyǵyn Alladan tilep bata berdi.
Sodan soń, aýdan basshysy aýdan ortalyǵyndaǵy ǵasyr kýágeri Vera Sevırıkovanyń shańyraǵynda boldy. Búginde 104 jasqa kelgen anaǵa merekelik quttyqtaýyn jetkizip, syı-syıapat kórsetti.
Al, Saryaǵash aýdanynyń ákimi Arman Abdýllaev Nurly jol aýylynyń turǵyny 104 jastaǵy Jadyra Keskenbaevany arnaıy quttyqtap, syı-sııapat tabystady. 7 ul-qyzdy dúnıege ákelgen aq jaýlyqty ana qazirgi tańda 35 nemere, 87 shóbere, 15 shópshek súıip otyr.
Sondaı-aq Arman Abdýllaev Saryaǵash qalasynyń turǵyny 104 jastaǵy altyn qursaqty ana Sáýle Saparbaevanyń shańyraǵyna boldy. 11 ul-qyzdy dúnıegen alyp kelgen batyr ananyń 39 nemere, 44 shóberesi bar.
«Biz eń aldymen analarymyzdy ardaqtaımyz. Sizder ómirdi nurlandyryp, shańyraqqa shattyq nuryn sebesizder. Sizderdiń qoldaýlaryńyz kóptiń júregine senimdilik uıalatyp, shýaq syılaıdy. Osy aıryqsha qasıetterińiz máńgilik saltanat quryp, elge yrys-qut darysyn. Aq jaýlyqty analarymyz qandaı qurmetke bolsyn laıyqty. Árqashan shańyraqtaryńyzǵa qut-bereke daryp, úılerińizden jylýlyq ketpesin. Januıalaryńyzǵa yntymaq tileımin!», - dedi aýdan ákimi Arman Abdýllaev.
Batyr analarymyz shańyraǵyna arnaıy quttyqtaı kelgen aýdan ákimine rızashylyqtaryn bildirip, jastyq shaqtarynan syr shertti. Sonymen qatar óńirdiń damýy jolynda jasap jatqan jańa bastamalarǵa sáttilik tilep, aq batalaryn berdi.
