Túrkistan oblysynda qarbyz alqabynan alǵashqy ónim jınala bastady
ASTANA. KAZINFORM — Túrkistan oblysynyń Jetisaı aýdanyndaǵy sharýalar bıylǵy qarbyzdy jınaýǵa kiristi, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
«Baharam» sharýa qojalyǵy egistik alqaptaryn K-30 kanaly arqyly keletin sýmen qamtamasyz etip otyr. Dıqandar sýdy turaqty ári ýaqytyly jetkizip otyrǵany úshin «Qazsýshar» RMK Túrkistan fılıalyna alǵys bildirdi.
— Bıyl 10 gektar jerge qarbyz ektik. Qazir alǵashqy ónimdi jınaý jumystary qarqyndy júrip jatyr. Sý máselesi bolǵan joq. Bul úshin Sý resýrstary jáne ırrıgatsııa mınıstrligine rızashylyǵymyzdy bildiremiz, — dedi «Baharam» sharýa qojalyǵynyń tóraǵasy Shakırboı Radjapov.
Jyl basynan beri Túrkistan oblysynyń aýyl sharýashylyǵy qajettilikterine 1 mıllıard tekshe metrden astam sý berildi. Onyń 307 mıllıon tekshe metri Jetisaı aýdanyna tıesili. Aýdan boıynsha baqsha daqyldaryn sýarýǵa 53,8 mıllıon tekshe metr sý jiberilgen. Qazir Jetisaı aýdanynda baqsha ónimderin, kókónis pen jońyshqa alqaptaryn sýarý jumystary jalǵasyp jatyr.
Buǵan deıin sáýir aıynyń basynda Túrkistan oblysynyń dıqandary qyryqqabattyń alǵashqy ónimin jınaı bastaǵanyn jazǵanbyz.
