Túrkistan oblysynyń Báıdibek aýdanyna jańa ákim taǵaıyndaldy
TÚRKІSTAN. KAZINFORM — QR Prezıdenti Ákimshiliginiń kelisimimen jáne Báıdibek aýdandyq máslıhaty depýtattarynyń kelisimi negizinde Ulasbek Sádibekov Báıdibek aýdanynyń ákimi bolyp taǵaıyndaldy.
Túrkistan oblysynyń ákimi Nuralhan Kósherov Báıdibek aýdanynyń aktıvine jańa ákimdi tanystyrdy. Óńir basshysy jańa ákimdi qyzmetimen quttyqtap, jaýapty jumysyna tabys tiledi.
Ulasbek Sádibekuly Sádibekov 1967 jyly Báıdibek aýdanynda dúnıege kelgen. Bilimi joǵary. 1992 jyly Tselınograd aýylsharýashylyq ınstıtýtyn «ınjener-elektrık» mamandyǵy boıynsha, 2001 jyly «Qaınar» ýnıversıtetin «ekonomıst» mamandyǵy boıynsha támamdaǵan.
Eńbek jolyn 1983 jyly Ońtústik Qazaqstan oblysy Alǵabas aýdanyndaǵy mal bordaqylaý kesheninde jumysshy bolyp bastaǵan. 1984-1986 jyldary Tselınograd aýylsharýashylyq ınstıtýtynda bilim alǵan. 1986-1987 jyldary Keńes Armııasy qatarynda áskerı qyzmet atqaryp, 1987-1992 jyldary atalǵan ınstıtýttaǵy oqýyn jalǵastyrǵan. 1992-1993 jyldary Aqmola qalalyq ákimshiliginiń jastar komıtetiniń tóraǵasy qyzmetin atqardy.
1993-1994 jyldary OQO Alǵabas aýdandyq ákimshiliginiń ishki saıasat bóliminde maman, bas maman, 1994-1996 jyldary aýdandyq ákimshiliktiń jastar isi, týrızm jáne sport basqarmasynyń basshysy boldy. 1996-1998 jyldary Shymkent qalasyndaǵy «Jetigen» JShS dırektory, 1998-2002 jyldary Báıdibek aýdany ákiminiń orynbasary, 2002-2004 jyldary OQO ákiminiń apparaty áleýmettik-mádenı kesheni bóliminiń meńgerýshisi, 2004-2005 jyldary oblystyń jastar isi jáne ishki saıasat departamentiniń dırektory bolyp eńbek etti.
Sondaı-aq 2005-2006 jyldary OQO ishki saıasat departamentiniń dırektory, 2006-2007 jyldary Báıdibek aýdanynyń, 2007-2009 jyldary Saryaǵash aýdanynyń ákimi qyzmetterin atqardy. 2009-2012 jyldary «Nur Otan» partııasy OQO fılıaly tóraǵasynyń birinshi orynbasary bolyp jumys istedi. 2012-2016 jyldary QR Parlamenti Májilisiniń depýtaty, 2016-2018 jyldary OQO ákiminiń orynbasary, 2018-2019 jyldary Túrkistan oblysy ákiminiń keńesshisi — Nur-Sultan qalasyndaǵy ókili, 2019-2023 jyldary Saıram aýdanynyń ákimi qyzmetin atqardy.
2023 jyldan bastap QR Parlamenti Májilisiniń depýtaty boldy. «Qurmet» jáne «Parasat» ordenderiniń ıegeri.
Buǵan deıin Nurlan Ábdirov OSK tóraǵasy bolyp qaıta taǵaıyndalǵanyn habarlaǵan edik.
