Qazaqstannyń ońtústigindegi bes óńirde sý alý kólemi 7,9 mlrd tekshe metrge jetti
TÚRKІSTAN. KAZINFORM — Bul týraly Sý resýrstary jáne ırrıgatsııa mınıstrligi málim etti.
Búgingi tańda óńir boıynsha jalpy sý alý kólemi 3,011 mlrd tekshe metr, al josparlanǵan lımıt — 3,645 mlrd tekshe metr. Qalǵan 17,4% sýarý maýsymy aıaqtalǵanǵa deıin alynady.
Atap aıtqanda, Jetisaı jáne Maqtaaral aýdandarynyń egistik jerlerin sýaratyn «Dostyq» memleketaralyq kanalynan alynǵan sý kólemi 787,7 mln tekshe metr. Al Otyrar, Shardara aýdandary men Arys qalasyn sýmen qamtamasyz etetin «Qyzylqum» magıstraldyq kanalynan alynǵan sý mólsheri 947 mln tekshe metr. Vegetatsııa kezeńi bastalǵaly beri Túrkistan oblysyndaǵy «Qazsýshar» fılıaly dıqandarmen sý berý boıynsha 9 608 kelisimshart jasasqan.
— Jalpy alǵanda Qazaqstannyń ońtústigindegi bes óńirde sý alý kólemi 7,9 mlrd tekshe metrge jetti. Vegetatsııa kezeńiniń sońyna deıin taǵy 2,2 mlrd tekshe metr sý alý josparlanyp otyr. Qazir Túrkistan oblysynda egistikter kezekpen sýarylyp jatyr. Aımaqtaǵy mınıstrliktiń jumys toby sýarmaly sýdyń ádil bólinýine turaqty baqylaý jáne monıtorıng júrgizýde, — dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.
Qazaqstannyń ońtústiginde sýarý kezeńi 20 kúnge erte bastalǵanyn eske sala keteıik. Aýa temperatýrasynyń joǵary bolýy men jaýyn-shashynnyń bolmaýy buǵan sebep bolǵan edi.
Eske sala keteıik, sý salasy mamandary sýarmaly sýdy ádil bólý úshin túngi kezekshilikke shyǵa bastaǵanyn jazǵan edik.