Túrkistan oblysynda jarylys bolǵan úıdiń turǵyndary jataqhanaǵa ornalastyryldy

TÚRKІSTAN. KAZINFORM - Túrkistan oblysynyń ákimi tıisti qyzmetterge avarııalyq-qalpyna keltirý jumystaryna kómek kórsetýdi, sondaı-aq osy ýaqyt arasynda turǵyndardy qajetti turmystyq jaǵdaılarmen qamtamasyz etý máselesin sheshýdi tapsyrdy.

Ákimdiktiń baspasóz qyzmetiniń habarlaýynsha, jaqyn kúnderi zaqymdanǵan turǵyn úıde qalpyna keltirý jumystary bastalady. 

Osyǵan deıin habarlaǵanymyzdaı, Túrkistan oblysy, Otyrar aýdany, Sháýildir aýylynda kópqabatty turǵyn úıde gaz jarylysy boldy.

Aldyn ala málimet boıynsha, jarylys tabıǵı gazdyń ekinshi qabattan shyǵýynan bolǵan. Oqıǵa saldarynan úsh páterdiń qabyrǵalary qırap, tereze janynan órt shyqqan. Órt tolyq sóndirildi.

Jarylys kezinde páter ıesi zardap shegip, aýdandyq aýrýhanaǵa jetkizildi. Dárigerler oǵan qajetti medıtsınalyq kómek kórsetip jatyr.

Oqıǵa ornynda TJD, Jedel járdem, Polıtsııa, jergilikti atqarýshy organdar jáne 104 apattyq qyzmeti jumys istedi. Úı turǵyndary ýaqytsha Sháýildir aýylyndaǵy kolledjdiń jataqhanasyna ornalastyryldy.

Oqıǵanyń naqty sebepteri tıisti qyzmettermen anyqtalýda.

Osyǵan deıin Túrkistan oblysyndaǵy kóppáterli turǵyn úılerdiń birinde gaz jarylysy bolǵany týraly jazdyq.