Túrkistan oblysynyń ákimi Nuralhan Kósherov referendýmda daýys berdi
TÚRKІSTAN. KAZINFORM – Búgin elimizde jańa Konstıtýtsııanyń jobasyn qabyldaý boıynsha respýblıkalyq referendým ótip jatyr.
Ýchaskelerde daýys berý jergilikti ýaqyt boıynsha saǵat 07:00-den 20:00-ge deıin júrgiziledi.
Demografııasy joǵary, halqy tyǵyz Túrkistan oblysynda belsendilik joǵary, eldiń kóńil kúıi kóterińki. Óńirdegi barlyq saılaý ýchaskelerinde memlekettik Ánuran shyrqalyp, alǵashqy saılaýshylar óz tańdaýyn jasap, daýys berip jatyr.
Túrkistan oblysynyń ákimi Nuralhan Kósherov alǵashqylardyń biri bolyp, Túrkistan qalasyndaǵy Qoja Ahmet ıAsaýı atyndaǵy HQTÝ-da ornalasqan №133 saılaý ýchaskesinde óz tańdaýyn jasady. Bul ýchaskede belsendilik joǵary, 18-ge endi tolǵan jastardan bastap, zeınetkerler de daýys berip jatyr.
Túrkistan oblysy boıynsha referendým ýchaskeleriniń sany – 947 (onyń ishinde jabyq ýchaskeler sany – 26). Qazirgi tańda Túrkistan oblysynda jalpy 2 mln 154 myńnan astam turǵyn bar. Onyń ishinde daýys berý quqyǵyna ıe azamattar sany – 1 187 257, bul óńir halqynyń 55,4 paıyzyna teń.
Respýblıqalyq referendýmǵa óńir joǵary deńgeıde daıyndaldy. Referendýmǵa oblys boıynsha jalpy sany 6380 komıssııa múshesi tartylǵan. Onyń ishinde 1 – oblystyq (7 múshe), 17 aýmaqtyq (119 múshe) jáne 947 ýchaskelik referendým komıssııalary (6 254 múshe) bar. Komıssııa músheleriniń 97 %-ynyń referendým jáne túrli deńgeıdegi saılaý naýqandaryn ótkizýde tájirıbesi bar. Sonymen birge baqylaýshylar da referendým barysyn turaqty qadaǵalap otyr.
Referendým ýchaskeleri qajetti qural-jabdyqtarmen, materıaldyq – tehnıkalyq jaǵynan tolyqtaı qamtamasyz etilgen, Oblys kóleminde bıylǵy 1 qańtardaǵy jaǵdaı boıynsha 16601 erekshe qajettiligi bar daýys berýshi azamat bar, olardyń 4 myńy qolarba paıdalanady, 8171-iniń kórý, sondaı-aq, 4430 azamattyń estý qabileti nashar. Olardyń daýys berýine qolaıly jaǵdaılar jasalǵan.
Jalpy óńirde referendým joǵary deńgeıde ótip, daýys berý jalǵasyp jatyr. Turǵyndardyń belsendiligi joǵary.