Túrkistan oblysynyń 4 aýdanynda kámelet jasqa tolmaǵan qyzdar joǵalyp ketti

Oqıǵa Otyrar, Saryaǵash, Keles, Jetisaı aýdandarynda boldy, dep habarlaıdy Kazinform.

Otyrar aýdandyq polıtsııa bólimine aryzdanǵan jergilikti turǵyn qyzynyń úıinen belgisiz baǵytqa shyǵyp, habarsyz ketkenin aıtqan.

Tártip saqshylary top-topqa bólinip, 16 jastaǵy qyzdy belgileri boıynsha izdestirdi. Jedel atqarylǵan sharalardyń nátıjesinde kámeletke tolmaǵan jasóspirim Shymkent qalasyndaǵy saıajaılardyń birinen tabylyp, úıine qaıtaryldy.

Sondaı-aq dál osyndaı aryzben polıtsııa kómegine Saryaǵash aýdanynyń turǵyny júgingen.

Ol da kámelet jasyna tolmaǵan qyzynyń kolledjdegi sabaǵyna ketip, qaıta oralmaǵanyn jetkizgen.

Polıtseıler 15 jastaǵy qyzdy Shymkent qalasyndaǵy jaldamaly páterde tanys qyzdarymen birge júrgen jerinen tapty.

Odan bólek, Keles aýdanynda aýrýhanada em alyp jatqan 17 jastaǵy qyz kóshege shyǵyp ketip, qaıta oralmaǵan.

Al, Jetisaıda 13 jastaǵy qyz joǵalǵan.

Shuǵyl izdestirý sharalaryn júrgizgen tártip saqshylary kelestik qyzdy Shymkent qalasynda páter jaldap turǵan jerinen tapsa, Jetisaılyq jasóspirim saıabaqtardyń birinde júrgen jerinen úıine qaıtaryldy.